Çexiyanın Milli Günü qeyd edilib

Bakı/28.10.23/Turan: Oktyabırın 27 də Bakıda Çex Respublikasının Milli Günü qeyd olunub.

Tədbirdə Çex Respublikasının Azərbaycandakı səfir Milan Sedlaçek çıxış edib. Diplomat deyib ki, dəyişən qlobal dünyada yeni təhdidlər, çətinliklər meydana çıxıb. Texnoloji tərəqqi və qloballaşma sosial münasibətlərin dəyişkənliyini və inkişaf edən dinamikasını daha da sürətləndirib.

Diplomat Azərbaycan və Çex Respublikası arasında oxşar məqama da toxunub: "Azərbaycanla xüsusən də suveren ərazilərimizin itirilməsi, işğalı və geri qaytarılması ilə bağlı ortaq tariximizi nəzərə alaraq, mən Qarabağda baş verən hazırkı prosesləri və sabitləşməni dəyərləndirirəm. Bəzi siyasətçilərdən fərqli olaraq proseslərə, baş verənlərə yerində şahid ola bilirəm. Mən Azərbaycan xalqına və Çex xalqına sülh əmin-amanlıq arzu edirəm".

Tədbirdə Azərbaycan Xarici İşlər Nazirliyi rəhbərinin müavini Fariz Rzayev iştirak edib. O öz çıxışında deyib ki, bu il iki ölkə diplomatik münasibətlərin yaradılmasının 30 illiyini qeyd edir. "Münasibətlərimiz qarşılıqlı hörmət və ehtirama əsaslanır. İki ölkə arasında davamlı siyasi dialoq aparılır, müxtəlif sahələrdə əlaqələrimiz genişlənir. Birgə səylərimiz nəticəsində strateji əlaqələrimizin genişlənəcəyinə ümid edirəm", - nazir müavini deyib. -0-