Ceyhun Osmanlı söhbəti telefona yaza bilməzdi

Baş Prokurorluq deputat Ceyhun Osmanlının bu orqana təqdim etdiyi audioyazını araşdırmağa başlayıb. Orda jurnalist X.İsmayılovanın əcnəbilərlə söhbətinin yazıldığı deyilir. 

«Bu gün onun az məlum olan audioyazısını Baş Prokurorluğa verdim», - deyə Osmanlı Facebook-da yazıb və əlavə edib: «Vətənə xəyanət bağışlanmır!».

Cümə axşamı Baş Prokurorluğun mətbuat xidmətinin rəhbəri Eldar Sultanov X.İsmayılovanın əcnəbilərlə söhbətinin audioyazını aldıqlarını təsdiq edib. 

Onun sözlərinə görə, söhbət hərtərəfli araşdırılacaq və qanuna uyğun qərar qəbul ediləcək. 

Osmanlının qeydindən və prokurorluğun şərhindən aydın olmur, hansı söhbətdən söz açılır.  

Amma son günlər hakimiyyətyönlü və özünü müxalif adlandıran KİV-lər X.İsmayılovanın Art Garden restoranında ABŞ Senatı aparatının 2 əməkdaşı ilə söhbəti və guya hakimiyyətə işləyən müxalifətçilərin siyahısının onlara verilməsi barədə hay-küy qaldırılıb. 

X.İsmayılova Osmanlının bəyanatı ilə bağlı deyib ki, Osmanlı restorana gələndə çıxmağa hazırlaşırdıq və hesabı xahiş edirdik. “Masalarımız arasında böyük məsafə vardı və o, danışığı yaza bilməzdi», - deyə X.İsmayılova bildirib. 

Amma X.İsmayılova istisna etməyib ki, söhbət restoranda gizli mikrofonla yazıla bilərdi. 

«Məncə, restoranın sahibi hakimiyyətə yaxındır. İstənilən halda, bu, məni narahat etmir. Açıq demədiyimi gizli demirəm», - deyə X.İsmayılova qeyd edib. 

Xatırladaq ki, Art Gardendəki söhbətdə RATİ direktoru Emin Hüseynov da iştirak edib. 

O, Turan-a bildirib ki, deputat restorana onlar çıxana yaxın gəlib. «Masalarımız arasında 15 metr vardı. Zal səs-küylü idi və Osmanlı danışığımızı telefona yaza bilməzdi», - deyə Hüseynov bildirib. 

O həmçinin hesab edir ki, söhbəti xüsusi xidmət orqanları yaza bilərdi. 

«Sirr deyil ki, xüsusi xidmət orqanları vətəndaş cəmiyyəti fəalları və əcnəbiləri izləyir. İndi Osmanlının əli ilə bu qanunsuz yazını leqallaşdırmaq istəyirlər», - deyə Hüseynov qeyd edib. 

Söhbətin məzmunu ilə bağlı o deyib ki, bu, qeyri-rəsmi nahar idi və vətəndaş cəmiyyətini narahat edən mövzularda söhbət olub –  insan haqları, ifadə azadlığı və s. 

«Eynulla Fətullayevin söhbətin məzmunu və İsmayılovanın sözləri ilə bağlı dedikləri həqiqəti əks etdirmir. Yazı çap olunandan 4-5 gün əvvəl Eynulla Fətullayev mənimlə görüşüb müsahibə almaq istədi. Ehtiyatlanıb hansı mövzuda olduğunu soruşdum. Çünki onun saytında son illər haqqımda çirkli və yalan məqalələr yazılıb.

Eynulla dedi ki, amerikalılarla görüşümüz, onlara verilən siyahı ilə maraqlanır. Dedim ki, söhbətdə heç bir siyahıdan söhbət getməyib. Amma Fətullayev məqaləsində bunu yazmayıb. Bundan başqa, İsmayılova və söhbətin digər iştirakçısı Rəşid Hacılıdan da heç nə soruşmayıb. 

Ən maraqlısı odur ki, bir sıra KİV-lər mövzunu şişirtməyə başlayıb. Onlar da məndən və Hacılıdan heç nə soruşmayıb. Ona görə söhbətin məzmunu və Fətullayevin açıqladığı “hakimiyyətin agenti” siyahısı  uydurmadır», - deyə Hüseynov qeyd edib. 

Onun fikrincə, hakimiyyətin təhriki ilə bu mövzu ətrafında KİV-də ehtiraslar coşdurulur. Bunun üç məqsədi ola bilər: ictimai rəyi sosial problemlərdən və intihar dalğasından yayındırmaq; İsmayılovanı hakim elitada korrupsiya faktlarını araşdırdığına görə cəzalandırıb gözdən salmaq; jurnalistləri və Qərbin maliyyələşdirdiyi layihələrdə iştirak edən vətəndaş cəmiyyəti fəallarını xarici agent elan etmək üçün Rusiyada olduğu kimi qanun qəbulu üçün zəmin hazırlamaq, - deyə Hüseynov bildirib. -06D-