Cəzaçəkmə müəssisəsində aclıq aksiyası keçirən İ.Əmiraslanovun səhhəti pisləşib

5 saylı cəzaçəkmə müəssisəsində (Xələc qəsəbəsi) həbs cəzası çəkən “Kür” vətəndaş cəmiyyəti qərargahının fəalı İlham Əmiraslanov iki gündür hüquqlarının pozulmasına etiraz əlaməti olaraq aclıq aksiyası keçirir. Əmiraslanovun yaxınlarının Turan-a verdiyi məlumata görə, avqustun 23-də cəzaçəkmə rəisi iki dəfə onu yanına çağırıb və aksiyanı dayandırmağı təklif edib.

Aclıq aksiyası ilə əlaqədar Əmiraslanovu təcrid olunmuş otağa keçirməyiblər və yanına həkim göndərməyiblər.

Əmiraslanov hələlik su belə içmir. Aksiyanın ikinci günündə o, başgicəllənmə və süstlük hiss edir.

Əmiraslanov hüquqlarının pozulmasından və xüsusən cəzasının üçdə birini çəkməsi ilə əlaqədar məntəqə tipli cəzaçəkmə müəssisəsinə köçürülməsi və müddətin yarısı bitdikdən sonra şərti azadlığa buraxılması haqda müraciətlərinə məhəl qoyulmamasından şikayət edir.

O hesab edir ki, ona qarşı qərəzli qərar siyasi motivlidir.

“Mən deyəndə ki, siyasi məhbusam, rəhbərlik bunu inkar edir. Amma eyni zamanda vaxtından əvvəl şərti azadlığa buraxılmaq haqqında müraciətlərimə baxılmaması ilə bağlı deyirlər ki, “burada bizim günahımız yoxdur”. Bununla onlar etiraf edirlər ki, mən siyasi məhbusam”, deyə Əmiraslanovun yaxınları onun sözlərini çatdırıb.

Əmiraslanov beynəlxalq təşkilatların nümayəndələrini cəzaçəkmə müəssisəsində ona baş çəkməyə çağırıb və bildirib ki, hüquqları bərpa edilənə qədər aclıq aksiyasını davam etdirəcək.

* İlham Əmiraslanov 2010-cu il daşqınından ziyan çəkmiş vətəndaşların hüquqları uğrunda prinsipial və ardıcıl mübarizəsi ilə məşhurdur. 2012-ci ilin iyununda o, qanunsuz silah saxlamaq ittihamı ilə həbs edilib və işgəncələrə məruz qalıb.

Sentyabrın 13-də Sabirabad rayon məhkəməsi Əmiraslanovu qanunsuz narkotik saxlamaq ittihamı ilə (CM-in 228.1-ci mad.) 2 il azadlıqdan məhrum edib. 2013-cü il yanvarın 25-də Şirvan Apellyasiya Məhkəməsi bu qərarı qüvvədə saxlayıb. Amnesty İnternational Əmiraslanovu “vicdan məhbusu” kimi tanıyıb. -06B-