Mətbuat İcmalı-24.08.13

Qəzetlərin əsas mövzularını və baş məqalələrini prezident seçkiləri təşkil edir. Müxalifət qəzetləri baş məqalə yerində Cəmil Həsənlinin Milli Şuranın yeni vahid namizədi kimi irəli sürülməsi, iqtidar qəzetləri prezident İlham Əliyev və birinci  ledi Mehriban Əliyeva ilə bağlı tərif dolu məqalələr dərc edib, müstə qil qəzetlər də bu və ya digər namizədlə bağlı yazılara üstünlük verib. Bütün qəzetlərdə ATƏT-in seçki missiyasının avqustun 26-da fəaliyyətə başlayacağı ilə bağlı məlumatlar dərc edib. 

Rəsmi və iqtidartönlü qəzetlər “Yeni Müsavat” qəzetinin baş redaktoru Rauf Arifoğlunun müxalifəti tənqid edən müsahibəsinə səhifələrində yer ayırıb.  

Bizim Yol 

Baş nazirin müavini, YAP sədrinin müavini, Qaçqınkom Əli Həsənov deyib ki, Azərbaycanda güclü iqtidar qarşısında rüsvayçı müxalifət var. 

Dağ yəhudiləri icması İlham Əliyevi dəstəklədikləri barədə bəyanatla çıxış edib. 

Fövqəladə hallar naziri Kəmaləddin Heydərov Yevlaxda vətəndaşları qəbul edib. 

Cəmi Həsənli bu gün sənədlərini MSK-ya təqdim edəcək. 

ACP sədri Rəsul Quliyev bildirib ki, vahid namizəd Amerika konqresmenlərinin xahişi ilə seçilib. Rəsul Quliyev Cəmil Həsənlinin namizədliyini tənqid edib və bildirib ki, onunla müqayisədə İlqar Məmmədov müxalifət hesab olunur. 

Qəzet ümumilikdə prezident seçkiləri ilə bağlı ondan çox yazı və müxtəlif məlumatları dərc edib. 

525-ci qəzet 

Açıq Cəmiyyət Partiyasının sədri Sülhəddin Əkbər Cəmil Həsənlinin namizədliyinə qarşıdır. “Biz dəfn komissiyasında iştirak etməyəcəyik”, deyə o Milli Şuranın sessiyasına münasibət bildirib.

Qəzet ATƏT-in Bakı ofisinin keçirdiyi sessiyaya istinad edərək “Azərbaycanda demokratik seçki üçün bütün şərait var” başlıqlı yazı dərc edib. 

İqtidaryönlü gənclər “Mənim Prezidentim” Gənclərin Təşəbbüs qrupunu təsis edib. Tanınmış müğənni Tünzalə Ağayeva da qrupun üzvüdür. 

Qəzet Rauf Arifoğlunun müsahibəsi də daxil olmaqla, prezident seçkiləri ilə bağlı daha bir neçə məqalə dərc edib. 

Azadlıq 

Qəzet səhifələrində prezident seçkiləri ilə bağlı onlarla məqalə və xəbərlərə yer ayırıb. 

“İlham Əliyevin 1 manat 65 qəpik müavinət artımı”, “Hakmiyyətdə ikinci namizəd məsələsi yenidən gündəmə gəldi”, “Oqtay Şirəliyev səhiyyə ilə deyil, tikinti ilə öyünür”, “İmişli sakinlərini polis döydü”, “Ziyafət Əsgərovun xatırlatdığı “Ölülər”” və çoxsaylı başqa məqalələrdə iqtidarın siyasəti tənqid olunur. 

AXCP sədri Əli Kərimli prezidentliyə namizəd Cəmil Həsənli barədə “Hər zaman ədalətin yanında olmağı bacaran şəxsiyyət” yazısı ilə çıxış edib. 

Qəzet “Yeni Müsavat” qəzetinin baş redaktoru Rauf Arifoğlunun müxalifətə qarşı tənqidi fikrilərinə cavabları dərc edib. Müxtəlif siyasi partiya funksionerləri Arifoğlunun fikrini qəbul etmir.

Tanınmış vəkil Aslan İsmayılov “Sizlər, haqları pozulanlar, nə edirsiniz?” məqaləsi ilə çıxış edib. Məqalədə haqları pozulan insanlar hüquqlarının müdafiəsi üçün mübarizə aparmağa çağırılır.     

Jurnalist Şahvələd Çobanoğlu “Pəncərədən əl çalanlar” yazısında Cəmil Həsənlinin namizədliyini təqdir edir. 

Yeni Müsavat 

MSK sədri Məzahir Pənahov Rüstəm İbrahimbəyovun ikili vətəndaşlığına istinad edərək bildirib ki, “kim Azərbaycan respublikasının prezidenti olmaq istəyirsə konstitusiyaya əməl etməlidir”. Konstitusiyaya görə, ikili vətəndaşlığı olan şəxslər prezident ola bilməz. 

Mərkəzi  Seçki Komissiyasında təsdiq olunan prezidnentliyə namizədlərin sayı 18 nəfər olub. 

Qəzet 7-ci səhifəsi Ümid Partiyasının seçkilərə hazırlığına həsr olunub.  

Ekspress 

Qəzet “Milli Şuranın ikinci nəfəsi” adlı məqalədə Cəmil Həsənlinin prezidentliyə namziədliyinin irəli sürülməsindən bəhs edir. Məqalədə iqtidar funksionerləri və müxalifət liderlərinə istinad edərək deyilir ki, “Rüstəm İbrahimbəyovun namizədliyi irəli sürüləndə YAP-çılar onun heç bir xidmətinin olmadığın deyirdilər, amma hələ Cəmil Həsənli barədə bunu demirlər. Hələ demirlər...” 

Yeni Azərbaycan 

Qəzet prezident İlham Əliyevin və birinci  ledi Mehriban Əliyevanın müsbət fəaliyyətini xarakterizə edən, müxalifətin isə kəskin tənqidinə yönəlmiş çoxsaylı məqalə və məlumatlar dərc edib. 

Yeni Azərbaycan öz adının üstündə eyni sütunda “Azərbaycanda sistem xarakterli islahatlar aparılacaq” adlı İlham Əliyev barədə, “Mehriban Əliyeva zəngin və çoxsaylı fəaliyyəti ilə ölkəmizi dünyada layiqincə tanıdır” başlıqlı yazılardan sitatlar dərc edib. 

Qəzet YAP icra katibinin müavini Siyavuş Novruzovun, “Yeni Müsavat” qəzetinin baş redaktoru Rauf Arifoğlunun, Milli Məclisin sədr müavini Bahar Muradovanın, YAP icra katibinin müavini Mübariz Qurbanlının müxalifətin tənqidinə yönəlmiş müsahibələrini dərc edib. Bununla yanaşı, qəzet Müsavat Partiyasının başqanı İsa Qəmbər, AXCP sədri Əli Kərimli, Milli Şura sədri Rüstəm İbrahimbəyov, Turan Agentliyinin direktoru Mehman Əliyev, Milli Şuranın yeni vahid namizədi Cəmil Həsənlinin əleyhinə məqalələr dərc edib. 

Azərbaycan 

Rəsmi dövlət qəzeti baş məqaləsində prezident Əliyevin 4 gündə 7 rayonda 24 sosial obyekt açdığını yazıb. 

Qəzet birinci səhifəsində həmçinin Baş Prokurorluğun Milli Şurada araşdırma aparacağı ilə bağlı məlumatını dərc edib. 

Rəsmi qəzet eyni zamanda 4-cü səhifəsində bütövlükdə “Xeyirxahlıq və mərhəmət işığında” başlıqlı İlham Əliyevin, 5-ci səhifə isə bütövlükdə “Ümidlərin ünvanı” başlıqlı birinci ledi Mehriban Əliyevanın müsbət fəaliyyəti mədh edilmiş yazı dərc edib.  

“Dağıdıcı müxalifət liderləri məğlub olacaqlarını yaxşı bilirlər” məqaləsində qeyd edilir ki, müxalifət Cəmil Həsənlini qurban verməklə seçki uğursuzluqlarını sığortalamaq istəyir. 

Qroznıda Qafqaz Xalqları Ali Dini Şurasının iclası olub. Bu qurum seçkilərdə İlham Əliyevi dəstəklədiyi barədə bəyanatla çıxış edib. İclasda Qafqaz Müsəlmanları İdarəsinin sədri Alahşükür Paşazadə iştirak edib.