C.Həsənli: Müxalifət qeyri-bərabər şəraitdə belə uğur qazanıb

Cümə günü Müsavat Partiyasının qərargahında Demokratik Qüvvələrin Milli Şurasının (DQMŞ) prezidentliyə namizədi Cəmil Həsənlinin Seçki Qərargahının məşvərətçi və səlahiyyətli təmsilçilərinin toplantısı keçirilib.

Toplantıda prezident seçkilərinin səsverməsi günü baş verən hüquqi pozuntu və saxtakarlıqlar diqqət mərkəzində olub. Seçkilərin müxtəlif seçki pozuntları və saxtakarlıqların müşaiyətilə keçməsi nəzərə çatdırılıb. 

Tədbirdə çıxış edən Milli Şuranın prezidentliyə namizədi Cəmil Həsənli bütün qərargaha fədakar əməyə görə təşəkkür edib. Mübarizənin müxalifət qüvvələri üçün qeyri-bərabər şəraitdə getdiyini və hətta bu qeyri-bərabər mübarizədə də müxalifətin qələbə qazandığını vurğulayıb. Beynəlxalq qurumların rəylərində seçkilərin saxtakarlıqla keçirilməsinin əksini tapması da müxalifətin uğurları sırasında göstərilib. 

C.Həsənli ATƏT/DTİHB-nin bəyanatı ilə razı olduğunu, təkcə seçkidə seçicilərin çox hissəsinin iştirak etməsi müddəası ilə razılaşmadığını vurğulayıb. Onun fikrincə, seçkilərdə ən yaxşı halda seçicilərin 20%-i iştirak edib. 

Bunları qeyd edən C.Həsənli seçkilərin nəticələrini tanımadığını və onun nəticələrinin ləğvi üçün mübarizənin davam etməkdə olduğunu söyləyib. 

Toplantıda çıxış edən Müsavat və Xalq Cəbhəsi Partiyalarının liderləri İsa Qəmbər və Əli Kərimli də seçkilərdə müxalifət namizədinin qalib gəldiyini qeyd ediblər. -05C-