Coşua Hak vətəndaş cəmiyyətinin nümayəndələrilə insan hüquqlarının vəziyyətini müzakirə edib

Bakı/20.10.23/Turan: Oktyabrın 20-də ABŞ dövlət katibinin Avropa və Avrasiya məsələləri üzrə köməkçisinin müavini Coşua Hak ABŞ səfirliyində hüquq müdafiəçiləri və insan hüquqları sahəsində ixtisaslaşan vəkillərlə görüşüb.

“Müdafiə xətti” hüquq- müdafiə təşkilatının rəhbəri  Rüfət Səfərov Turan-a bildirib ki, bir saat yarım davam edən görüşdə vəkillər Şəhla Hümbətova, Elçin Sadıqov və Zibeydə Sadıqova iştirak ediblər.

Görüş zamanı Azərbaycanda insan hüquqlarının durumu ətrafında fikir mübadiləsi aparılıb.

"Biz siyasi məhbus probleminə toxunduq, repressiv tədbirlərin getdikcə artmasından narahatlığımızı bildirdik. Vəkillər müdafiə etdikləri ayrı-ayrı siyasi məhbuslar barədə danışdılar.  Mən dedim ki, amerikalı diplomat Azərbaycan Qarabağda ərazi büyövlüyünü, suverenlyini bərpa etdiyi bir dövrdə səfər edib. Bu mənada Azərbaycan hakimiyyətinin hərbi siyasəti haqlıdır. Amma təəssüf ki, eyni vaxtda ölkədə tənqidçi dairələrə, müxalifətə qarşı repressiya dalğası artıb”, - o deyib.

Səfərov bildirib ki, müzakirələr zamanı Dövlət Departamentinin dünya üzrə vicdan məhbusları ilə bağlı dərc etdiyi siyahıya Azərbaycandan olan vicdan məhbuslarının  da adlarının daxil edilməsi təklif edilib.

“Məsələn, ötən il bu siyahıya Azərbaycandan hüquq müdafiəçisi Elçin Məmmədin adı salınmışdı. Bu siyahıya Azərbaycanda həbsdə olan hüquq müdafiəçilərindən bir neçəsinin adını daxil etməklə  onların azadlığına nail olmaq olar”, - Səfərov hesab edir.

Onun sözlərinə görə, Coşua Hak Bakıdakı görüşlərində insan hüquqları ilə bağlı məsələləri qaldıracağını vəd edib.0