DADP-nin bir hissəsi Mehriban Əliyevanın prezidentliyə namizədliyini irəli sürdü
Demokratik Azərbaycan Dünyası Partiyasının (DADP) rəhbərliyi partiyanın adından bir qrup şəxs tərəfindən deputat Mehriban Əliyevanın prezidentliyə namizədliyinin irəli sürülməsinə etiraz olaraq çərşənbə axşamı BMM-də mətbuat konfransı keçirib.
Partiyanın keçmiş icra katibi olmuş, indi isə sədr müavini olduğunu iddia edən Sevda Xurşudova və onu dəstəkləyənlər bu günlərdə deputat Mehriban Əliyevanın prezidentliyə namizədliyini irəli sürüblər. Bu addım ölkədə ciddi rezonans doğurub, ictimaiyyətin marağını bu məsələyə kökləyib. Bu gün mətbuat konfransı keçirən partiya sədri Fatma Əliyeva və s. buna aydınlıq gətirmək istəyiblər.
Onu qeyd edək ki, F.Əliyeva 2012-ci ilin oktyabrında qurultayda sədr seçildiyini deyib, qarşı tərəfi partiya rəhbərliyini özbaşına ələ keçirmək cəhdində ittiham edib. Bu şəxslərin partiyaya hər-hansı aidiyyatı olmadığı bildirilib. Partiyanın adından M.Əliyevanın namizədliyini irəli sürən S.Xurşudova və onu dəstəkləyənlər “təxribatçı qrup” adlandırılıb. Bu şəxslər xarici dövlətdən və konkret olaraq Moskvada yaşayan azərbaycanlı milyarder Söyün Sadıqovdan maliyyə dəstəyi almaqda ittiham edilib. Bu qrupun arxasında güclü qüvvə olduğu “etiraf” edilib.
PA-nın əməkdaşı Rasim Mirzəyevin S.Xurşudovanın dəstəsinin himayəçisi olduğu iddia edilib. F.Əliyeva S.Xurşudovaya və onu dəstəkləyənlərə qarşı mübarizə apardığı üçün R.Mirzəyev tərəfindən təzyiqlərə məruz qaldığını söyləyib.
Partiyanın M.Əliyevanın yox, dövlət başçısı İlham Əliyevin namizədliyini müdafiə etdiyi deyilib.
F.Əliyevanın partiya komandası mətbuat konfransında nitqlərini daha çox S.Xurşudovanın xarici ölkə vətəndaşı olması və “təmiz keçmişi” olmaması üzərində qurmaq ustəyiblər. Gürcüstan vətəndaş olması dəfərlərlə xatırladılan S.Xurşudovanın Azərbaycanda siyasətlə məşğul olması qanunsuz sayılıb. Onun bir dəfə miqrasiya qaydalarını pozduğuna görə ölkədən xaric edildiyi deyilib. Familiyasını Qələndərli, Haqverdiyeva və son olaraq Xurşudova kimi dəyişdirməsinə diqqət çəkiblər. S.Xurşudovanın Azərbaycan vətəndaşı ilə ailə qurması və nikah prosesinin sürətlə həyata keçirildiyini deməklə, himayəçisi olduğunu da xatırladıblar.
Partiya rəhbərliyi bu vəziyyətdən çıxmaq üçün S.Xurşudovanı partiya adından danışdığı üşün məhkəməyə verməyə hazırlaşır və bu haqda xüsusi mətbuat konfrnasının keçiriləcəyi anonsu verilib.
“Turan”ın müxbirilə söhbətində isə partiyanın qurucusu Məmməd Əlizadə hər iki tərəfi qeyri-legitim adlandırıb. Belə ki, 2-3 il öncə partiyadan getdiyini deyən M.Əlizadə sədr olaraq Mirkazım Seyidovun seçildiyini deyib. Sonradan partiya daxilində baş verən daxili qarşıdurmalar nəticəsində M.Seyidov vəzifəsindən qanunsuz şəkildə kənarlaşdırılıb. M.Əlizadəyə görə həmin vaxtdan partiyada legitim rəhbərlik yoxdur.
DADP 1992-ci ildə Məmməd Əlizadə tərfindən təsis olunub. 2003-cü idən sonra partiya aktiv fəaliyyət fazasına keçib. M.Əlizadə 2011-ci ildə partiya sədrliyindən istefa verib. Partiya rəhbərliyi partiyanın 130 minə yaxın üzvü olduğunu bildirir. -05C-
Rəy yaz