DAK Güney Azərbaycandakı durumu müzakirə edib

Dünya Azərbaycanlıları Konqresi (DAK) çərşənbə axşamı öz ofisində Güney Azərbaycanda ictimai-siyasi duruma dair ictimai dinləmə təşkil edib.

İranda prezident seçkiləri, Güney Azərbaycan türklərinin insan haqları problemləri, Urmu gölünün quruması dinləmənin əsas müzakirə obyekti olub.

DAK sədri Sabir Rüstəmxanlı İranda prezident seçkilərini sıradan bir seçki adlandırıb. Bu seçkinin Güney Azərbaycan türklərinin həyatında hər-hansı köklü dəyişikliklərə səbəb olmayacağı nəzərə çatdırılıb. İran prezidentinin seçkiöncəsi təbliğatında insan haqlarına hansı önəmi verəcəyi haqda çıxışları olmaması qeyd olunub. 

Yenə də milli haqlar uğrunda mübarizəyə rəsmi Tehranın həbslər, işgəncələr vasitəsilə cavab verməsinə diqqət çəkilib. Millətin öz haqqı uğrunda mübarizəni davam etdirməsi bəyənilib, lazımi dəstəyi qazanacağı vədi verilib. Urmu gölünün taleyinə gəlincə, gölün 75%-i quruyub, yalnız 25%-də su qaldığı qeyd edilib. Qurumanın qarşısını almaq üçün beynəlxalq ekoloji qurumların bu fəlakətə qarşı birgə mübarizə aparmalı olduqları nəzərə çatdırılıb. 

İranda “Yeni GAMOH” partiyasının fəaliyyəti vurğulanıb. Bu qurumun İran daxilində açıq fəaliyyət göstərəcəyini bəyan edən ilk partiya olduğu qeyd olunub. Bu cəsarətə görə partiyanın 5 rəhbər üzvünün həbsə alındığını, hər birinin 9 il müddətinə azadlıqdan məhrum edildiyi xatırladılıb. Eyni zamanda, Şimali Azərbaycandan bu tip fəaliyyətlərə dəstəyin zəif olması qınanılıb. Hətta Güney Azərbaycan məsələsi BMT-də müzakirəyə çıxarılarkən Azərbaycan dövlətinin bu məsələyə indiyə kimi bir dəfə belə münasibət ifadə etməməsi təəccüb dolu suallar yaradıb.   

Natiqlər Güney Azərbaycan məsələsinin ətraflı araşdırılması üçün Strateji Araşdırmalar Mərkəzi yaradılmasına ehtiyac olduğunu xüsusi qeyd ediblər. Bununla yanaşı, Qarabağ məsələsilə bağlı institut yaradılmasının vacibliyi vurğulanıb. Bu sahədə türk dünyası birliyinin həmrəyliyini təmin edə bilmək üçün ümumtürk tarixi, ümumdünya türk problemlərinin araşdırılması və s. ilə bağlı qurumlar yaradılması təklifləri səslənib.

Son zamanlar rəsmi Tehranın milli fəallara təzyiqlərinə cavab olaraq İranın Azərbaycan səfirliyi önündə aksiya keçirilməsi təklifi irəli sürülüb. -05C-