Daxili İşlər Nazirliyi Azər Qasımlının xanımının da ölkədən çıxışına qadağa qoyub

Politoloq Azər Qasımlının xanımı Samirə Qasımlının Azərbaycandan çıxşışına qadağa qoyulub. Bu barədə Turan-a Samirə Qasımlı bildirib.

Noyabrın 30-da Bakı hava limanında ona xarici ezamiyyətə getməyə icazə verməyiblər.

"Əvvəlcə pasportuma möhür vurdular,  sonra bir dəqiqə gözləməyimi istədilər. Bundan sonra bildirdilər ki, ölkədən çıxışıma "stop" qoyulub”, - Qasımlı qeyd edib. Onun sözlərinə görə, “stop”u Daxili İşlər Nazirliyi qoyub.

"Ailəmizdən belə qisas alırlar, həyat yoldaşım Azər Qasımlıya təzyiq göstərirlər. Bu da mənim şəxsi tənqidi çıxışlarımla bağlıdır", - Qasımlı bildirib. Daxili İşlər Nazirliyindən şərh almaq mümkün olmayıb.

Samirə Qasımlı siyasi psixologiya üzrə ekspert kimi müstəqil KİV-də öz şərhlərilə tanınır.

Bundan əvvəl noyabrın 22-də onun həyat yoldaşı, Siyasi Menecment İnstitutunun direktoru, politoloq Azər Qasımlını ölkədən buraxmayıblar. Bir neçə gün sonra o, Bakı polisində bəzi cinayət işləri üzrə şahid qismində dindirilib. Lakin ölkədən çıxışına qadağa qoyulmasının səbəbini izah etməyiblər.