Deputat Fazil Mustafaya sui-qəsd cəhdində İranın əlinin olması təsdiqləndi

Bakı/03.04.23/Turan: Dövlət Təhlükəsizliyi Xidməti martın 28-də axşam deputat Fazil Mustafaya qarşı terror aktı törətmiş bir qrup şəxsi müəyyən edib. Aksiyanın təşkilatçısı Azər Sarıcanovdur. Atəş açan Səbuhi Şirinov olub.

Sarıcanov dini fəaldır, 1976-cı ildə Salyanda anadan olub. Dəfələrlə İrana səfər edib. 1993-2002-ci illərdə İranın Qum şəhərində dini təhsil alıb. Bu müddətdə İranın xüsusi xidmət orqanları ilə əməkdaşlığa cəlb edilib. Qayıtdıqdan sonra İran kəşfiyyatının pulu ilə bizneslə məşğul olub.

Deputata qarşı terror aktı İran xüsusi xidmət orqanlarının sifarişi, maliyyə və təşkilati dəstəyilə həyata keçirilib.

Deputata atəş açan Səbuhi Şirinov 1986-cı ildə Ağdam rayonunda anadan olub. Dini fəal 2017-2022-ci illərdə 15 dəfə İrana gedib, İran xüsusi xidmət orqanları ilə əməkdaşlığa cəlb edilib və döyüş hazırlığı keçib. Deputata atəşi Sarıcanovun göstərişilə açıb.

Qrupun digər üzvləri bunlardır: Elşad Əsgərov 1983-cü ildə Bakıda anadan olub. Dini fəal 2013-2018-ci illərdə 9 dəfə İrana gedib; Emin Əliyev 1970-ci ildə Bakıda anadan olub. Həmçinin dini fəaldır, 2004-2015-ci illərdə üç dəfə İranda olub.

Sonuncu iki nəfər deputat Fazil Mustafaya qarşı terror aktının təşkilində Sarıcanova kömək edib.

Sözügedən şəxslər Dövlət Təhlükəsizliyi Xidmətində saxlanılır. Bu gün saxlanılan digər iki nəfərin şəxsiyyəti hələ açıqlanmayıb. 02D