Deputat İlham Əliyev dini dözümsüzlüyə çağırır

Parlamentin deputatı, prezident administrasiyasının rəhbəri Ramiz Mehdiyevin kürəkəni İlham Əliyev cümə günü “uzun saqqallı və qısa şalvarlı” dindarlara qarşı qəti mübarizəyə çağırıb.

Parlamentin iclasında çıxış edən Əliyev dini etiqad azadlığı haqqında qanuna dini ədəbiyyata nəzarəti sərtləşdirən düzəlişləri dəstəkləyib. 

“Bizim dinimiz var və biz bu dinə qulluq edirik. Ancaq mən bu qanuna dəyişikliyi dəstəkləyirəm. Çünki çalışmalıyıq ki, qısa şalvarlıları və saqqalı sinəsinə qədər düşənləri cəmiyyətimizdən təcrid edək. Axşamlar bulvara çıxanda insan onları görəndə xarici görünüşlərinə nifrət edir”, deyə deputat bildirib.

Bu fikri dini dözümsüzlüyün təzahürü kimi qiymətləndirmək olar.

Media Hüquqları İnstitutunun direktoru Rəşid Hacılı deputatın çıxışını “inancı olan insanlara qarşı xoşagəlməz və təhqiredici” adlandırıb. Hüquq nöqteyi-nəzərdən bu çıxışda nifrətə və dözümsüzlüyə çağırış var.

“Əslindən parlament özü bu çıxışa qiymət verməli və onu pisləməli idi”, Hacılı belə hesab edir.

Eyni zamanda. deputatın çıxışına prokurorpluq orqanları da hüquqi qiymət verməlidir, belə ki, ifadələrdə CM-in 283-cü maddəsinə (milli, irqi, sosial və ya dini nifrət və düşmənçiliyin salınması) daxil olan əlamətlər var. Bundan başqa, bu, ifadə, vicdan və dini etiqad azadlığına qəsddir. -16D06-