DİN XİN rolunda?

Dünya Azərbaycanlıları Konqresinin (DAK) sədri, deputat Sabir Rüstəmxanlı İran tərəfin verdiyi nota əsasında Azərbaycan Daxili İşlər Nazirliyinin (DİN) qurumun fəaliyyətilə maraqalanmasına dair cümə axşamı RATİ-də mətbuat konfransı keçirib. 

İran tərəf adı çəkilən və özü də yarımgizli notanı Azərbaycan tərəfə 10 gün öncə verib. Xarici İşlər Nazirliyi, İranın Azərbaycan səfirliyi belə bir nota olduğunu inkar edib. Amma DİN İran tərəfdən belə nota göndərildiyini təsdiqləyib. S.Rüstəmxanlı Azərbaycan XİN-in notanı Prezident Administrasiyasına (PA), PA-sının da öz növbəsində DİN-ə göndərildiyini açıqlayıb. Bundan sonra DİN İctimai Təhlükəsizlik İdarəsinin əməkdaşları DAK rəhbərliyinə yox, əməkdaşlara zəng edərək izahat vermələrini, kompüterlərini yoxlamaq istədiklərini istəyib. DAK sədri bu məsələdə DİN-in məqsədinin nə olduğunu müəyyən edə bilmədiyini deyib. Amma DAK-ın fəaliyyətinin məhdudlaşdırılması, hətta ölkədən çıxarıla bilməsi kimi ethtimalları açıqlayıb. DİN-in adı çəkilən idarəsinin əməkdaşı ilə telefonla əlaqə saxlayan S.Rüstəmxanlı DAK rəhbəri kimi bütün sorğuların ona ünvanlanmasını tələb edib. 

S.Rüstəmxanlı bu notanı İran tərəfin “yekəxanalığı” adlandırıb. ABŞ-ın, Avropanın təzyiqləri önündə səsini belə çıxara bilməyən İranın Azərbaycana nota göndərməsi “Azərbaycanı zəif sayması”nın nəticəsi kimi dəyələndirilib.

Həm də İran tərəfin göndərdiyi notada ilk cümlədə DAK-ın fəaliyyətinin “iki ölkə arasında imzalanan müqavilələrə uyğun olmaması” ifadəsi keçir. “Biz bilmirik söhbət hansı qarşılıqlı müqavilələrdən gedir, buna rəsmi Bakı özü aydınlıq gətirməlidir”, -deyə DAK sədri nəzərə çatdırıb. Rəsmi Bakıİran tərəfin Azərbaycan dövlətinə, dövlət rəmzlərinə, millətinə təhqiramiz mövqeyinə səssiz qalmaq ittihamına məruz qoyulub. DAK-ın dünya azərbaycanlılarının hüquqlarını müdafiə qurumu olduğu və bu yolu davam etdirəcəyi deyilib. DAK-ın heç zaman Azərbaycanın daxili siyasətinə qarışmadığı və bundan sonra da qarışmayacağıqeyd olunub. Bir ictimai qurum olaraq rəsmi Bakının da DAK-ın ictimai fəaliyyətini təftiş etmək haqqı olmadığı vurğulanıb. 

İranda 35 milyon Azərbaycan türkü yaşadığı, bu insanların ən elementar hüquqlardan məhrum olduqları nəzərə çatdırılıb. “İran tərəf tənqid olunmağını istəmirsə, Azərbaycan türklərinin bütün insani haqlarını təmin etsin, təmin etməyəcəksə, dahaağır tənqidlərə məruz qalacaq”, -deyə S.Rüstəmxanlı İran tərəfə xəbərdarlıq edib. Kütləvi aksiyalara gəlincə, DAK-ın məqsədəuyğun saydığı halda İranın Azərbaycan səfirliyi önündə aksiylar keçirəcəyi anonsu verilib.-05C-