Dmitri Medvedyev: «Rusiya üçün Azərbaycan və Ermənistanla münasibətlər eyni dərəcədə vacibdir»

Rusiya üçün Azərbaycan və Ermənistanla münasibətlər eyni dərəcədə vacibdir. Bu barədə Rusiyanın baş naziri Dmitri Medvedyev Azərbaycan prezidenti İlham Əliyevlə görüşündə bildirib.

O qeyd edib ki, Moskva və Bakı arasında strateji tərəfdaşlıq münasibətləri inkişaf  edir, “ölkələrimizin iqtisadi, humanitar sahələrdə çoxlu layihələri var, siyasi məsələlər var”.

“Görünür, indiki səfərdən bu məqsədlər üçün istifadə etmək lazımdır. Əlbəttə, indi vəziyyət o qədər də asan deyil, təəssüf ki, Ermənistan və Azərbaycan arasında Dağlıq Qarabağ münaqişəsi kəskinləşib. Açığı deyim ki, bu vəziyyət bizi çox narahat edir. Bizim üçün hər iki dövlətlə əməkdaşlıq olduqca vacibdir. Eyni zamanda biz Minsk Qrupunun iştirakçısı, Təhlükəsizlik Şurasının daimi üzvü kimi Birləşmiş Millətlər Təşkilatları səviyyəsində müəyyən edilmiş yanaşmalara sadiqik”,  - Medvedyev vurğulayıb.

O, Qarabağ münaqişəsində davamlı sülhün bərqərarına ümid etdiyini bildirib. Baş nazirin sözlərinə görə, RF nizamlanma üçün hər şeyi edəcək.-06D-

* * *

Rusiyanın baş naziri Dmitri Medvedyev Bakıya gəlib. O, Azərbaycan prezidenti İlham Əliyev və baş nazirlə görüşəcək. RİA-Novosti bildirib.

Bir gün öncə o, Yerevanda olub, erməni həmkarı və prezident Serj Sarqsyanla görüşüb. —0-