Dövlət Departamenti Azərbaycana hərbi texnikanın satışını tövsiyə etməyib

ABŞ Nümayəndələr Palatasının Xarici Məsələlər Komitəsinin üzvü Hovard Berman Dövlət Departamentinin Azərbaycana hərbi  texnikanın satışını qadağan edən qərarını alqışlayıb. 

 “Dövlət Departamenti sərhədlərə nəzarət edən vertolyotlar üçün hərbi avadanlığın satılacağı ölkələrin siyahısına Azərbaycanı da daxil etməyi planlaşdırmışdı. Lakin Berman narahatlıqla bildirib ki, bu avadanlıqdan erməni qoşunlarına qarşı istifadə oluna bilər”, - onun  ofisindəki mənbə bildirib.  

Ötən gün Berman rəsmi bildiriş alıb  ki, Azərbaycan bu avadanlığı almaq hüququ əldə edəcək ölkələrin siyahısından çıxarılıb. 

Mayın 29-da Berman dövlət katibi Klintona məktub yazaraq Azərbaycana hərbi texnika satmamağı xahiş edib.

    “Avadanlıqdan Ermənistana qarşı istifadə olunmasının mümkünlüyünü nəzərə alsaq, bu satış Azərbaycan üçün  tamamilə yalnış siqnal ola bilərdi, xüsusən son dəhşətli hadisələr fonunda”, - məktubda deyilir. 

    “Dövlət katibi Klintonun bu qərarı erməni xalqının maraqlarına uyğundur və regionda sülhə xidmət edir”, - Berman  vurğulayıb.

    Öz növbəsində Dövlət Departamentindəki mənbə bu məlumatı şərh etməyib, lakin Turan-a bildirilib ki, “Dövlət Departamentinin hərbi texnikanın satışını tövsiyə etdiyi ölkələrin sırasında Azərbaycanın da olmasını güman etmək çətindir”.

    “ABŞ-ın çoxdankı siyasəti belədir – Qafqazda münaqişə ölkələrinə hərbi texnika göndərilməsin. Odur ki, tamamilə aydındır ki, Vaşinqton Azərbaycana və yaxud Ermənistana silah satmayacaq”, - mənbə vurğulayıb. -025V-