Dövlət Departamenti: “Lavrovun bəyanatı təsdiq edir ki, Rusiya işğalçılıq müharibəsi aparır”

Vaşinqton/21.07.22/Turan: Çərşənbə günü ABŞ işarə edib ki, Moskvanın Ukrayna ərazilərini ilhaq etmək cəhdlərini cəzasız qoymayaq.

Rusiyanın xarici işlər naziri Sergey Lavrov Moskvanın təkcə Donbas və Luqanskı deyil, həm də Xerson, Zaporojye və digər şəhərləri  ələ keçirmək planları barədə açıq şəkildə bəyan edən ən yüksək vəzifəli fiqurdur.

"Bu müharibə ərazi istilaları uğrunda gedən müharibədən başqa bir şey deyil. Bu, bizim fevralın 24-nə qədər xəbərdarlıq etdiyimiz bir şeydir və o vaxtdan bəri daim bu barədə danışırıq",- çərşənbə günü brifinqdə Dövlət Departamentinin mətbuat katibi Ned Prays deyib.

Vaşinqton Ukraynanın suverenliyinə və müstəqilliyinə, ərazi bütövlüyünə dəstək olaraq bundan sonra da onun yanında olacaq. "Heç bir dövlət, nə qədər böyük olsa belə, beynəlxalq sərhədləri güc yoluyla dəyişmək iqtidarında olmamalıdır", - Prays deyib.

O həmçinin diqqəti Rusiya və Ukraynanın hələ martda sülhün astanasında olması,  amma Ukraynanın razılaşmanı pozması ilə bağlı Putinin bu yaxınlardakı açıqlamasına yönəldib. "Biz bilirik ki, bu, doğru deyil, yalandır", - o deyib və əlavə edib ki, Lavrovun etirafı bunu bir daha  sübut edir.

Lavrovun yaranmış vəziyyətdə Qərbi ittiham etməsilə bağlı TURAN-ın sualına cavabda Prays deyib:

"Rusiyanın hücumu dünyaya sübut etdi ki, bu, ərazi istilaları uğrunda müharibədir, bu, bizim ötən əsrin ortalarından bəri görmədiyimiz təcavüzdür. Lavrov və başqaları günahı Qərbin üzərinə atmağa çalışırlar, lakin Qərb və beynəlxalq ictimaiyyət yaxşı bilir ki, günah tamamilə Kremldə və prezident Putindədir”, - o əlavə edib.

ABŞ-ın hesablamalarına görə, bu gün Ukraynada Rusiyanın itkisi 15 000 nəfər ölü və 45 000 nəfər yaralıdır, bu barədə çərşənbə günü Mərkəzi Kəşfiyyat İdarəsinin  direktoru bildirib.

"Ukraynalılar da zərər çəkiblər, amma bir qədər azdır",- Uilyam Burns deyib.

Öz növbəsində Pentaqon işarə edib ki, Ukrayna bir neçə həftə davam edən şiddətli döyüşlərdən sonra Donbası itirməyib. Vəziyyət çox gərgindir, Birləşmiş Qərargah Rəisləri Komitəsinin rəhbəri Mark Milli jurnalistlərə bildirib. Son üç ay ərzində Rusiya cəmi 10 mil irəli gedib. "Ukraynalılar rusları ərazinin hər düymü üçün bədəl ödəməyə məcbur edirlər", - o əlavə edib. 25B