Dövlət Komissiyası və Beynəlxalq Qızıl Xaç Komitəsi insan qalıqlarının identifikasiyası üzrə layihə həyata keçirirlər

Bakı/25.05.23/Turan: Mayın 23-24-də Azərbaycanda “Məhkəmə arxeologiyası və məhkəmə antropologiyası: humanitar tətbiqlər” mövzusunda ilk beynəlxalq konfrans keçirilib.

Konfrans Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyası, Azərbaycan Milli Elmlər Akademiyasının Arxeologiya, Etnoqrafiya və Antropologiya İnstitutu  və Beynəlxalq Qızıl Xaç Komitəsinin  birgə təşkilatçılığı ilə keçirilib.

Tədbir Beynəlxalq Qızıl Xaç Komitəsinin dəstəyilə həyata keçirilən pilot layihə çərçivəsində baş tutub.

Layihə çərçivəsində aidiyyatı qurumlar itkin düşmüş şəxslərin axtarılması, insan qalıqlarının götürülməsi, analizi və identifikasiyası üzərində birgə işləyərək Azərbaycan tarixində ilk olan məhkəmə arxeologiyası və məhkəmə antropologiyası yanaşmasının əsasını qoymuş olublar.

“İnsan qalıqlarının identifikasiyası uzun prosesdir. Təkcə bioloji nümunələrə arxayın olmaq olmaz. Bu proses zamanı məhkəmə patologiyası, məhkəmə antropologiyası, məhkəmə stomatologiyası və genetika arasında əməkdaşlıq vacibdir”, - Beynəlxalq Qızıl Xaç Komitəsinin  Məhkəmə- Tibbi Ekspertizası Departamentinin keçmiş rəhbəri, məhkəmə antropoloqu Dr.Luis Fondebrider deyib.

Digər ekspertlərin iştirakı ilə aparılan müzakirə zamanı Arxeologiya, Etnoqrafiya və Antropologiya İnstitutunda məhkəmə arxeologiyası və məhkəmə antropologiyasının akademik fənn kimi yaradılmasının vacibliyi vurğulanıb. 06D