Dunya Miyatoviç Hilal Məmmədovun və həbsdə olan digər jurnalistlərin azad edilməsinə çağırıb

ATƏT-in KİV azadlığı məsələləri üzrə nümayəndəsi Dunya Miyatoviç  “Tolışi sado” qəzetinin redaktoru Hilal Məmmədovun 5 il azadlıqdan məhrum edilməsi barədə hökmdən sonra Azərbaycan hakimiyyətini jurnalistlərə qarşı təqiblərə son qoymağa çağırıb.

“2012-ci ilin noyabrında Bakıya rəsmi səfərim zamanı mən Məmmədova və həbsdə olan digər məhbuslara baş çəkdim,  onlarla bağlı məsələləri hakimiyyətlə müzakirə etdim. Azərbaycanda azad KİV  üçün əlverişsiz şəraitin yaxşılaşmadığını görmək mənim üçün ağırdır. Bu durum yaxşılaşmaq əvəzinə pisləşir. Çünki daha bir jurnalist bu gün uzunmüddətli hıbs cəzası aldı”, - Miyatoviç bildirib. “Mən hakimiyyəti Məmmədova və digər jurnalistlərə qarşı ittihamları götürməyə və onları azad etməyə çağırıram”, - o qeyd edib.

“Tolışi sado” qəzetinin baş redaktoru H.Məmmədov sentyabrın 27-də 5 il müddətinə azadlıqdan məhrum edilib. O, narkotik maddənin saxlanmasında, vətənə xəyanətdə və ədavətin qızışdırlmasında ittiham olunur.

Miyatoviç “Bizim yol” qəzetinin jurnaisti Pərviz Həşimlinin və “Nota PS” qəzetinin redaktoru Sərdar Əlibəylinin də həbsindən narahatlığını bildirib.

“Mən prezident seçkiləri ərəfəsində müstəqil KİV ətrafında vəziyyətin mənfi yöndə inkişafından çox narahatam”, - Miyatoviç vurğulayıb.--0--