Dunya Miyatoviç Mehman Hüseynovun saxlanmasını pisləyib

ATƏT-in KİV  azadlığı üzrə nümayəndəsi Dunya Miyatoviç Bakıda bloger  Mehman Hüseynovun saxlanması ilə əlaqədar bildirib ki, Azərbaycanda müstəqil KİV və ifadə azadlığı müdafiəçilərinin sıxışdırılmasının davam etməsi və gücləndirilməsindən xəbər verən hərəkətlərə son qoyulmalıdır.

“Demək olar ki, bütün müstəqil KİV nümayəndələri və media üzrə QHT-lər müxtəlif əsassız və həyəcan doğuran ittihamlara əsasən təqiblərə məruz qalır”, - o vurğulayıb.

M.Hüseynov noyabrın 10-da ATƏT-in tədbirində iştirak etmək üçün Tbilisiyə gedərkən Bakı hava limanında saxlanılıb. O, polis şöbəsində bir neçə saatlıq dindirmədən sonra buraxılıb.

D.Miyatoviç qeyd edib ki, “Azadlıq” radiosunun jurnalisti Xədicə İsmayılova da Tbilisiyə konfransa dəvətli olub. Lakin onun hərəkət azadlığına məhdudiyyət qoyulduğundan o,  tədbirə gedə bilməyib.

“Mən Avropa Şurasının insan hüquqları üzrə komissarı Nils Muyjnieksin bu yaxınlardakı rəyi ilə tam razıyam. Mən azad KİV-ə qarşı düşmənçiliyə son qoyulması çağırışı ilə növbəti dəfə Azərbaycan hakimiyyətinə müraciət edirəm”, - o bildirib.

ATƏT nümayəndəsi bu həyəcanlı tendensiyanın aradan qaldırılması yollarının axtarışında hakimiyyətə yardımçı olmaq üçün yenidən Bakıya gəlməyə hazır olduğunu bildirib.

D.Miyatoviç hazırda Tbilisidədir. O, ATƏT-in keçirdiyi KİV üzrə 11-ci Cənubi Qafqaz konfransında iştirak edir.

* ATƏT-in KİV azadlığı məsələləri üzrə nümayəndəsi  ATƏT iştirakçısı olan 57 ölkədə media sahəsində vəziyyətin inkişafını müşahidə edir. O,  ifadə  və KİV azadlığına dair pozuntular barədə ilkin xəbərdarlıq funksiyasını yerinə yetirir və KİV sahəsində ATƏT çərçivəsində qəbul edilmiş öhdəliklərə tam əməl olunmasına çağırır.—0-