Əfqan Sadıqov Gürcüstan İstintaq Təcridxanasında aclığı davam etdirir

Gürcüstanda həbsdə olan Azərbaycanın Azel TV saytının rəhbəri Əfqan Sadıqov üç gündür İstintaq Təcridxanasında aclığı davam etdirir. 

O, əsassız cinayət təqibinə etiraz edir və azad edilməsini tələb edib, bu barədə Turan-a onun həyat yoldaşı Sevinc Sadıqova bildirib.

Bu gün o, əri ilə telefona danışıb. O qeyd edib ki, Sadıqov aclıq edən məhbusların olduğu kameraya köçürülüb. Bu kamerada gündə iki dəfə məhbusların qan təzyiqi ölçülür. Sadıqova hələlik heç bir tibbi yardım göstərilməyib.

S.Sadıqova bildirib ki, ərinin aclıq etməsinə diqqət cəlb etmək üçün Gürcüstan ombudsmanına müraciət etmək niyyətindədir.

Əfqan Sadıqov sentyabrın 20-da Gürcüstan hakimiyyətinin ona siyasi sığınacaq verməkdən imtina etməsindən sonra aclığa başlayıb.

Xatırladaq ki, Sadıqov təqibə məruz qalacağından ehtiyatlanaraq, 2023-cü ilin dekabr ayında ailəsi ilə birlikdə Gürcüstana gəlib. İyulun ortalarında o, Gürcüstandan Türkiyəyə buraxılmayıb, ona yalnız Azərbaycana gedə biləcəyi bildirilib.

Avqustda Azərbaycandan ekstradisiya sorğusu daxil olduqdan sonra Sadıqov həbs edilib.

Bakıda o, pul tələb etməkdə ittiham olunur.

Jurnalist ittihamları təkzib edir. Bundan əvvəl o, Azərbaycanda iki dəfə mühakimə olunub. Hüquq müdafiə təşkilatları hər ikisində onu siyasi məhbus kimi tanıyıblar.