Əli Gülalıyevin işi nazirin nəzarəti altına keçib (YENİLƏNİB)

Hüquq müdafiəçisi Oqtay Gülalıyev Bakı şəhər Baş Polis İdarəsində iki saatlıq görüşdən sonra Turan-a bildirib ki, söhbət oğlu Əlinin sentyabrın 23-də naməlum şəxslər tərəfindən döyülməsi və ona sui-qəsdlə bağlı olub.

O bildirib ki, görüşdə BŞBPİ rəis müavini Elxan Həsənov, Xətai rayon polis şöbəsinin rəisi Əkbər İsmayılov, BŞBPİ cinayət-axtarış idarəsinin rəisi Araslan Ağayev iştirak ediblər.

“Mənə bildirilib ki, oğlumun işi daxili işlər naziri Ramil Usubovun və nazir müavini Vilayət Eyvazovun şəxsi nəzarəti altındadır”, deyə Gülalıyev bildirib.

Araşdırmanın Xətai rayon 37-ci polis bölməsindən elə həmin rayonun polis idarəsinə verilməsi haqqında göstəriş verilib.

Ona bildiriblər ki, sentyabrın 26-da Gülalıyevin oğlunu prosessual pozuntularla dindirmiş polis əməkdaşları barəsində inzibati tədbirlər görüləcək. 

Gülalıyevə həmçinin ehtimal olunan cinayətkarların fotorobotlarının hazırlandığı bildirilib.

CM-in 221.1.2-ci (xuliqanlıq) maddəsi ilə cinayət işi açılıb.

* Xatırladaq ki, sentyabrın 24-də 16 yaşlı Əli Gülalıyev dörd naməlum şəxsin hücumuna məruz qalıb, döyülüb və bıçaq xəsarətləri alıb. Dünən Gülalıyevin evinə gələn bir neçə polis yalan ifadə verməyi tələb edib. -16D04-

2013 Sentyabr 27 (Cümə) 16:20:45

Hüquq müdafiəçisi Oqtay Gülalıyev bu gün Bakı şəhər Baş Polis İdarəsinə çağırılıb.

Gülalıyevin Turan-a verdiyi məlumata görə, BPİ-də o, oğlu Əliyə hücum – onun döyülməsi və bıçaq xəsarətləri alması hadisəsini müzakirə etmək üçün idarənin rəis müavini Elxan Həsənovla görüşüb.

Oqtay Gülalıyev işə Xətai rayon polis bölməsində baxılmasına etiraz edir.

Xatırladaq ki, sentyabrın 24-də 16 yaşlı Əli Gülalıyev dörd naməlum şəxsin hücumuna məruz qalıb, onu döyüblər, daha sonra bıçaq xəsarəti yetiriblər. Dünən bir neçə polis Gülalıyevin evinə gələrək, yalan ifadə verməyi tələb ediblər. -16D04-