Əli Həsənov Böyük Britaniyaya görə narahatdır

Rəsmi Bakı AŞ baş katibi Tornborn Yaqlandın Britaniyanın “Qardian” qəzetində dərc edilmiş Azərbaycanda insan hüquqlarının pozulması haqqında tənqidini narazılıqla qarşılayıb. Xüsusən, Prezident Administrasiyasının şöbə müdiri Əli Həsənov Avropa Şurası baş katibinin ifadələrini təkzib etməyə tələsib.

“Bəzi hallarda beynəlxalq təşkilatlar, o cümlədən Avropa Şurası təşkilatın üzvü olan ayrı-ayrı dövlətlərə təzyiq göstərir.

Uydurma “siyasi məhbuslar” məsələsinin süni şəkildə qabardılması, əsassız, qeyri-obyektiv iddialar, Azərbaycanı qaralamaq cəhdləri Avropa Şurası çərçivəsində əməkdaşlığa ziyan vurur və bu təşkilata olan etibarı sarsıdır”, deyə Həsənov AzerTAc agentliyinə bildirib.

Yaqlandın məqaləsində əksini tapmış “bəzi iddialar müəyyən anti-Azərbaycan qüvvələrinin təsirinin nəticəsi və əsassız, subyektiv mühakimələrdir”.

Azərbaycanın qanunlarında və beynəlxalq hüquqda hansısa peşə nümayəndələrinin cinayət məsuliyyətindən azad edilməsi kimi bir imtiyaz yoxdur.

Buna görə bəyanatlar, müsahibələr, müxtəlif təzyiq metodları qanunun aliliyinə hörmətsizlikdir, deyə Həsənov bildirib.

İkili standartlar və qərəzlilik Avropa Şurasına və Avropa Məhkəməsinə inamı o dərəcədə sarsıdıb ki, Böyük Britaniya kimi demokratik dövlət belə bu Avropa qurumlarından çıxmaq niyyətindədir, deyə Həsənov kədərini ifadə edir. -06D-