Əli Həsənov Quba ictimaiyyətilə görüşüb

Dövlət başçısının köməkçisi Əli Həsənov Quba ictimaiyyətilə görüş keçirib. Görüş sakitləşdirici xarakter daşıyıb. Əsasən o, əhalini iqtsadi problemlərin müvəqqəti olduğuna və hökumətin onları həll etməyə qadir olduğuna inandırmağa çalışıb.

Ə.Həsənov qeyd edib ki, ölkəyə təxminən 200 milyard dollar sərmayə qoyulub. Bunun təxminən 100 milyardı Azərbaycanın özünün sərmayəsidir, digər 100 milyard isə xarici investorlar tərəfindən  qoyulub. 

Neftin qiymətinin kəskin şəkildə aşağı düşməsi bütün dünya ölkələrinə, o cümlədən Azərbaycana öz təsirini göstərir. “Hətta belə bir şəraitdə ötən il bizim iqtisadiyyatımız 1,1 faiz artıb, qeyri-neft sənayesində isə artım 8,4 faiz təşkil edib”, - o vurğulayıb.

Ə.Həsənovun sözlərinə görə, Şərq-Qərb və Şimal-Cənub nəqliyyat dəhlizlərindən gəlir əldə edəcək.

Bakı-Tbilisi-Qars dəmir yolunun tikintisi və bunun da nəticəsində Şərqlə Qərbi birləşdirən Azərbaycanın Avropa-Asiya əlaqələrində xüsusi halqa təşkil etməsi gələcəkdə Azərbaycanın əsas strateji resurslarının böyük hissəsini təmin edəcək.  Bundan başqa İrandan və Fars körfəzi bölgəsindən tranzit istifadə ölkəyə böyük gəlirlər gətirəcək.

  “Biz postneft dövrünə, yəni neftin bitməsi, neftdən gələn gəlirlərin dayanması dövrünə 2030-cu illərə güclü, rəqabətədavamlı iqtisadi sistemlə çıxmağı planlaşdırırıq”, - o qeyd edib.

“Lakin neftin qiymətinin süni şəkildə, bəzi beynəlxalq proseslərin təsiri altında, bir sıra beynəlxalq qüvvələrin təhriki ilə aşağı düşməsi bizi bir qədər tez yaxaladı”, - Ə.Həsənov vurğulayıb.

Sonra o, regionların uğurlu inkişafı, əhalinin rifahının yüksəlməsi, işsizliyin və yoxsulluğun azalması, əmək haqları və prensiyaların artmasından danışıb.

Ə. Həsənov 2016-cı ildə çox ciddi iqtisadi və siyasi islahatların həyata keçiriləcəyini bildirib.

İdarəetmədə struktur dəyişiklikləri həyata keçiriləcək, inkişafa mane olan, bir-birini təkrarlayan, səmərəsiz işləyən strukturlar ya ləğv olunacaq, ya da onların fəaliyyəti təkmilləşdiriləcək.

Ə.Həsənov əlavə edib ki, dövlət xarici ölkələrə xeyli miqdarda kapital yatırıb. Təkcə Türkiyə iqtisadiyyatına qoyulan və gələcək illərdə qoyulacaq 20 milyard dollara yaxın xarici kapital var. 

Regionlara toxunan Ə.Həsənov etiraf edib ki,

Azərbaycan rayonlarının 90 faizi dövlətin dotasiyasında oturub mərkəzdən maliyyələşdirilir. “Axı bu sonsuza kimi davam edə bilməz. Dövlət ancaq zəruri məsələlərin maliyyə təminatını öz üzərində saxlamalıdır”, - Ə.Həsənov  yerli hakimiyyətləri sadə vətəndaşlara şərait yaratmağa çağırıb.

Xatırladaq ki,  bir neçə həftə əvvəl Qubada və qonşu Siyəzəndə əhali etiraz aksiyaları keçirib və bu aksiyalar polislə toqquşmaya çevrilib. İğtişaşlara sosial problemlər – yoxsulluq, işsizlik səbəb olub. Onlarla adam saxlanılıb.-02D-