Əli Həsənov Rusiyanı hədələdi

Prezident Administrasiyasının ictimai-siyasi şöbəsinin rəhbəri Əli Həsənov Moskvada Orxan Zeynalovun törətdiyi hadisəyə və bir neçə gündür bunun ətrafında cərəyan edən məsələlərə münasibətini bildirib.

O, jurnalistlərə açıqlamasında bildirib ki, kimin tərəfindən törədilməsindən asılı olmayaraq, istənilən cinayət ölkə qanunvericiliyi çərçivəsində araşdırılmalı, onu törədən şəxs məsuliyyətə cəlb olunmalı və müvafiq cəzasını almalıdır.

“Ancaq bu proses həmin ölkədə yaşayan, qanuni şəkildə əmək fəaliyyəti ilə məşğul olan digər xarici vətəndaşların, hansısa xalqın nümayəndələrinin hüquqlarının, biznes fəaliyyətinin məhdudlaşdırılmasına, yerli ictimaiyyətdə onlara qarşı mənfi rəy formalaşdırılmasına təkan verməməlidir”, deyə şöbə müdiri qeyd edib.

O, Rusiyanın hüquq-mühafizə orqanları tərəfindən bu hadisə ətrafında həyata keçirilən tədbirləri qeyri-adekvat adlandırıb, yerli KİV-lərin qızışdırıcı mövqeyinin isə bumeranq effekti verə və Rusiya cəmiyyəti üçün arzuolunmaz proseslərin inkişafına şərait yarada biləcəyini qeyd edib.

Öz növbəsində, Azərbaycan XİN bildirib ki, Azərbaycan tərəfi Orxan Zeynalovla görüş almaq üçün Rusiya tərəfi ilə danışıqlar aparır. Bu barədə bugünki brifinqdə XİN-in mətbuat katibi Elman Abdullayev bildirib.

Onun sözlərinə görə məhkəmənin qərarına qədər saxlanılan şəxsə qarşı kobud davranış və KİV-də onun cinayətkar kimi təqdim olunması günahsızlıq prezumpsiyasına ziddir.

“Mövcud insident məişət zəminində törədilib”, deyə Abdullayev qeyd edib.

Onun sözlərinə görə, Orxan Zeynalova zəruri konsulluq dəstəyi göstəriləcək. -16D04-