Əli Həsənov: �Telekanallarda dövlət dilində pis danışırlar�

Bakı/06.10.17/Turan: "Müasir dövrdə geniş vüsət alan qloballaşma prosesi dövlət dilinin istifadə sahəsindən də yan keçməyib", - prezidentin köməkçisi Əli Həsənov KİV-də dövlət dilindən istifadə olunmasına həsr edilmiş konfransda bildirib.

"Təəssüf ki, biz tez-tez kütləvi informasiya vasitələrində, o cümlədən elektron KİV-də dövlət dilinin norma və prinsiplərinə uyğun olmayan söz və ifadələrin işlədilməsinin şahidi oluruq", - o vurğulayıb.

Prezident İlham Əliyev 2012-ci ilin mayında "Azərbaycan dilinin qloballaşma şəraitində zamanın tələbinə uyğun istifadəsi və ölkədə dilçiliyin inkişafına dair Dövlət Proqramı haqqında" sərəncam imzalayıb.

Sərəncamda bu gün dilimizin müxtəlif səviyyələrdə, xüsusilə KİV-də işlənməsində fonetik, sintaktik və semantik normalardan ciddi yayınmaların olduğu vurğulanır.

Çox zaman filmlərin dublyajında və xarici dillərdən edilən bədii və elmi tərcümələrdə nöqsanlar müşahidə olunur, küçə və meydanlardakı reklamlarda adi qrammatik qaydalar gözlənilmir.

Ə.Həsənov qeyd edib ki, Dövlət Proqramında sadalanan həmin nöqsanlar bu gün də aradan tam qaldırılmayıb. O, KİV-i bu məsələlərə diqqət yetirməyə çağırıb.-06D--