Əli İnsanov hakimiyyəti dövlət mülkiyyətinin özəlləşdirilməsindən gələn vəsaiti mənimsəməkdə ittiham edib

Bu gün Bakı Apellyasiya Məhkəməsində (BAM) hakim Qədim Babayevin sədrliyi ilə keçmiş səhiyyə naziri Əli İnsanovun işi üzrə təkrar məhkəmə prosesi davam edib. Təkrar istintaq Avropa İnsan Hüquqları Məhkəməsinin 14 mart 2013-cü ildə İnsanovun ədalətli məhkəmə təhqiqatı hüquqlarının pozulması haqqında qərar qəbul etməsi ilə əlaqədar aparılır. AİHM-nin qərarının icrası üçün Azərbaycan Ali Məhkəməsinin Plenumu 15 noyabr 2013-cü ildə işi təkrar baxılması üçün BAM-a göndərib.

Yanvarın 17-də müdafiə tərəfi hakimlərin qeyri-obyektiv mövqeyi və təqsirləndirilən şəxsin və vəkillərin vəsatətlərini təmin etməməsi ilə əlaqədar məhkəmə heyətinə etiraz edib. Lakin bu gün etirazın qəbul edilmədiyi elan edilib. İnsanov şüşəli bölməyə yerləşdirilib. Onu yalnız hakim mikrofonu qoşduğu zaman eşitmək olurdu. O, həmçinin zalı yalnız mikrofonla danışıldığı zaman eşidə bilirdi. Vəkillər buna etiraz ediblər. Lakin məhkəmə vəkillərin etirazına məhəl qoymayıb.

Daha sonra İnsanov söz istəyib və xalqı Məhəmməd Əmin Rəsulzadənin 130 illik yubileyi münasibətilə təbrik edib. O bildirib ki, gün gələcək, dahi öndərin (Rəsulzadənin) cənazəsi Ankaradan Bakıya gətiriləcək və burada dəfn olunacaq. İnsanov həmçinin müdafiə hüquqlarının pozulduğunu və vəkilləri ilə məsləhətləşməsinə imkan verilmədiyini bildirib. Daha sonra prokuror İnsanova iqtisadi cinayətlərlə bağlı irəli sürülmüş əvvəlki ittihamları elan edib.

Fasilə zamanı vəkil Toğrul Babayev şüşə bölməyə yaxınlaşmağa çalışıb, lakin mülki geyimli şəxslər onu dayandırıblar və kobud şəkildə itələyiblər. Fasilədən sonra vəkil bu şəxslərin kimliyinin müəyyən edilməsi haqqında vəsatət qaldırıb. “Müvəkkilimin hüquqlarını müdafiə etməyə qorxuram. Məhkəmə zalında mənə qarşı güc tətbiq edən bu insanlardan qorxuram. Onların kimliyinin müəyyən edilməsində israr edirəm”, deyə vəkil bildirib. Amma onun vəsatəti rədd edilib. Digər vəkil Şahverdi Ağaveyis işin birinci instansiya məhkəməsinə qaytarılması və İnsanovun həbsdən azad edilməsi haqqında vəsatət qaldırıb.

O xatırladıb ki, Ali Məhkəmə AİHM-nin 4 müxalifətçinin işi ilə bağlı analoji qərarı üzrə işin birinci instansiya məhkəməsinə göndərilməsi haqqında qərar qəbul edib. Lakin bu vəsatət də təmin edilməyib. İnsanov özü məhkəməni siyasi sifariş yerinə yetirməkdə ittiham edib. O, ittihamları təkzib edib. İnsanov xatırladıb ki, qondarma dövlət çevrilişinə cəhd ittihamı ilə həbs edilib və 16 ay həbsdə saxlanılıb, daha sonra başqa saxta ittihamlarla mühakimə edilib. İnsanov bildirib ki, Azərbaycan hakimiyyətinin “kürü diplomatiyasından” daha güclü çıxıb və Strasburq məhkəməsində işi qazanıb. İnsanov İlham Əliyevin adını çəkən kimi hakim mikrofonu söndürürdü. “Mənim səsimdən qorxursunuz”, deyə İnsanov bildirib.

O “İlham Əliyevdən özəlləşdirmə haqqında soruşun” dedikdə hakim yenidən mikrofonu söndürüb. Buna cavabda İnsanov şüşənin arxasından qışqırmağa və əlləri ilə rəqəmlər işarə edərək, ölkədə 50 min obyektin özəlləşdirilməsindən 30 mlrd. dollar əldə edildiyini, bu vəsaitin İlham Əliyevə verildiyini iddia edib. Proses fevralın 6-da davam etdiriləcək. -03B06-