QHT-lər və parlamentarilər konsensus əldə edə bilmədi

Qeyri-hökumət təşkilatları və qanunvericilər 17 dekabr 2013-cü ildə “Hüquqi şəxslərin dövlət qeydiyyatı və dövlət reyestri haqqında”, “QHT-lər haqqında”, “Qrantlar haqqında” qanunlara, İnzibati Hüquqpozmalar Məcəlləsinə edilmiş dəyişikliklərlə bağlı ortaq məxrəcə gələ bilmədilər. 8 əlavə və 50 dəyişiklik edilib.

Cümə günü Milli Məclisdə vətəndaş cəmiyyəti nümayəndələrinin Milli Məclisin Hüquq məsələləri və dövlət quruculuğu komitəsinin sədri Əli Hüseynli və QHT-lərə Dövlət Dəstəyi Şurasının sədri, deputat Azay Quliyev ilə görüşünün nəticəsi belə olub. Hüseynli görüşün nəticələrinə görə haqqın.az saytına bildirib ki, aydın olmayan məsələ qalmayıb və prezident qanunvericiliyə edilmiş dəyişiklikləri imzalayacaq, amma İqtisadi Araşdırmalar Mərkəzinin rəhbəri Qubad İbadoğlu Turan-a bildirib ki, görüşdə iştirak edən QHT nümayəndələri dəyişikliklər edilməsi zərurəti ilə bağlı qənaətedici cavab ala bilməyiblər. İstisna yalnız odur ki, dəyişikliklərdən 90 gündə bir QHT-lərin qeydiyyatı reyestrindən çıxarış təqdim edilməsi zərurəti haqqında bənd çıxarılıb.

QHT-lər dəyişiklikləri, xüsusən QHT-lərin fəaliyyətində pozuntulara görə cərimə ölçülərinin sərtləşdirilməsi haqqında düzəlişləri qeydiyyatdan keçməmiş QHT-lərin işi üçün maneələr yaradan, QHT- lərin qeydiyyatının dayandırılması üçün imkanları genişləndirən və s. məhdudlaşdırıcı düzəlişlər kimi qəbul ediblər. Yaranmış vəziyyətlə əlaqədar yanvarın 16-da QHT-lər forum keçirərək, dövlət başçısını parlamentin 17 dekabr 2013-cü ildə qanunlara qəbul etdiyi QHT-lərin fəaliyyətini məhdudlaşdıran dəyişikliklər paketini imzalamamağa çağırıblar.

Forumun yekunlarına görə 60 QHT prezident İlham Əliyevə qeyri-hökumət təşkilatlarının fəaliyyətini məhdudlaşdıran dəyişiklikləri imzalamamaq çağırışı ilə müraciət qəbul ediblər. Onlar qanunvericiliyə QHT-lərin onsuz da ağır olan iş şəraitini daha da çətinləşdirən mürtəce düzəlişləri imzalamamağa və hakimiyyət və vətəndaş cəmiyyəti arasında 2012-ci ilin yayında başlamış, daha sonra dondurulmuş dialoqu davam etdirməyə çağırıblar. “Məsələnin əhəmiyyətini anladığınızı nəzərə alaraq, Sizdən dayandırılmış dialoq prosesinin davam etdirilməsinə təşəbbüs etməyi xahiş edirik.

Həmçinin, diqqətinizə çatdırırıq ki, qeyri-hökumət təşkilatlarının ümidlərimizi və diləklərimizi Sizə çatdırmaq üçün Sizinlə birbaşa görüşə ehtiyacı var”, deyə müraciətdə bildirilir. Dəyişikliklərin qəbul edildiyi parlament divarları arasında başlamış dialoqun QHT nümayəndələrinin Azərbaycan qeyri-hökumət təşkilatlarının gələcək taleyi haqqında yekun qərar qəbul etməli olan prezidentlə görüşünə qədər gedib çatacağı istisna deyil. -0-