AXCP sədri Əli Kərimli RATİ-nin Media Mərkəzində keçirdiyi mətbuat konfransında əsasən son aylarda AXCP-nin rayonlarda keçirdiyi konfransların dağıdılması və fəallara fiziki təzyiqlər, onların mülkiyyətinə ziyan vurulması və həbslərdən danışıb.
Onun sözlərinə görə, AXCP-çilərə fiziki təzyiqlər, onların mülkiyyətinin dağıdılması ya polisin iştirakı, ya da müşahidəsi ilə baş verir.
Son bir neçə ayda AXCP 30-dək rayonda konfranslar keçirib. Onlardan 7-də fəallara fiziki hücum olub, əmlakları dağıdılıb.
“Bu, hökumətin sistemli repressiya fəaliyyətidir. Təsadüflər təkrar olunmur”, deyə o qeyd edib.
Ə.Kərimli AXCP-nin tədbirlərinin fəalların evlərində keçirildiyini və İlham Əliyev hökumətinin bundan da qorxduğunu diqqətə çatdırıb. “Son 7 ildə AXCP-nin mərkəzi qərargahı yoxdur. İqtidar hətta ofis kirayələməyə də imkan vermir. Amma Yeni Azərbaycan Partiyası bütün rayonlarda rüşvət və korrupsiya pulları hesabına keçmiş Kommunist Partiyalarının ofislərindən də dəbdəbəli qərargahlar tikdirir”.
AXCP sədri Daxili İşlər Nazirliyinə, Baş Prokurorluğa və Yeni Azərbaycan Partiyasına media vasitəsi ilə müraciət ünvanlayıb.
“Yetər ki, güc orqanları bir siyasi partiyaya xidmət etsin. Polis YAP-ın repressiya alətinə çevrilib, Prokurorluq qanunun aliliyinə nəzarət etməlidir. Respublika Prokurorluğu AXCP üzvlərinə, onların mülkiyyətinə qarşı edilən cinayətlərə göz yummamılıdır. Nəhayət, YAP bizim hakimiyyətin dövründə yaranıb. Başqasına qarşı edilənlərə biganə qalmayın. Bir gün YAP da müxalifət olacaq. Heç bir hakimiyyət daimi olmayıb. Müxalifətə gələcəyin hakimiyyəti kimi baxın”, deyə o müraciət edib.
Ə.Kərimli Azərbaycan hakimiyyətini imitasiya siyasətinə son qoymağa da çağırıb.
“Bir tərəfdən milyonlarla vəsait sərf edib tədbirlər keçirib ölkənin tolerant olduğunu nümayiş etdirirlər. Digər tərəfdən isə siyasi opponentlərinə divan tuturlar. YAP “Buta Palace”da təntənəli qurultay keçirdiyi vaxtda AXCP fəallarına divan tuturdu”, deyə o qeyd edib.
Kərimli eyni zamanda müxalifətin vahid qüvvələrinin Milli Şurada birləşdiyini və vahid namizədlə seçkilərə getdiyini xatırlatdı. O, müxalifət qüvvələrini də rayonlarda təşkilatlanmağa çağırdı. “Bizi repressiyalar qorxutmur. Partiya üzvlərinə repressiyalar, mülkiyyətlərinin dağıdılmasına baxmayaraq, rayonlarda konfranslarımızı davam etdiririk və bundan sonra da davam etdirəcəyik, bütün siyasi partiyaları təşkilatlanmağa çağırıram”.
O hesab edir ki, Milli Şura tezliklə bütün xalqın dəstəyinə nail olacaq.
“Milli Şuranın vahid namizədi keçid dövrünün vahid siyasi qüvvəsinə çevriləcək”, deyə Kərimli bildirib.
AXCP sədri “Rüstəm İbrahimbəyovun prezidentliyə namizədliyinin qeydə alınmaması, ölkəyə buraxılmaması təqdirində Milli Şuranın ehtiyat namizədi olacaqmı?”, sualının cavabında deyib ki, Mili Şuranın vahid namizədinin qeydə alınmaması alternativsiz seçki demək olar.
Kərimli həmçinin siyasi həbslərə toxunub. Ölkədə hazırda 80-dən çox siyasi məhbus var. Milli Hərəkatın veteranlarından olan Qurban Məmmədov 3-cü dəfə siyasi həbsə atılıb. “Onun həbsi Azərbaycan hökumətini ifşa edən çıxışları ilə bağlıdır. Bütün siyasi məhbuslar hər gün müdafiəsini hiss etməlidir. Bu potensial siyasi məhbusları da mübarizəyə ruhlandırır”, deyə AXCP sədri bildirib.
O, bir sıra beynəlxalq təşkilatların, bəzi dövlətlərin Azərbaycanla bağlı fərqli bəyanatlarına toxunub. “Sosial şəbəkələr avtoritar rejimlərlə yanaşı diplomatların da fəaliyyətini aşkar edir. Yəqin ki, bir sıra dövlətlər diplomatlarının sonradan Azərbaycan Dövlət Neft Şirkətində işləməsini qadağan edən sənəd imzalayacaq”, deyə o, Amerikanın Azərbaycandakı səfirindən sonra Türkiyənin sabiq səfirinin də ARDNŞ-nin strukturlarında işə qəbul edilməsini nümunə göstərib.
Milli Şura vahid namizəd məsələsindən öncə keçid dövrünün islahatlarını və vahid namizədin səlahiyyətlərini nəzərdə tutan sənəd qəbul edəcək. -03C-
Siyasət
-
Rəsmi Bakı Polşa prezidenti Ancey Dudanın Ermənistana rəsmi səfəri zamanı Azərbaycanla sərhədə getməsini pisləyib.
-
Times of India nəşrinin məlumatına görə, Pinaka raket sistemlərinin ilk partiyası Ermənistana göndərilib.
-
Azərbaycanda növbəti bələdiyyə seçkiləri 29 yanvar 2025-ci ildə keçiriləcək. Bu barədə Mərkəsi Seçki Komissiyasının bugünkü iclasında komissiyanın rəhbəri Məzahir Pənahov bildirib.
-
Azərbaycan prezidentinin sərəncamı ilə Siyavuş Kərimi Milli Konservatoriyanın rektoru vəzifəsindən azad edilib.
Rəy yaz