Elmar Məmmədyarov: «Ermənistan danışıqlardan yayınır»

Azərbaycan və Rusiya arasında çağdaş münasibətlər strateji tərəfdaşlıq xarakteri daşıyır, bir çox mühüm  məsələlərdə iki ölkənin mövqeyi üst-üstə düşür. Bu barədə Azərbaycan xarici işlər naziri Elmar Məmmədyarovun Rusiyanın “Nezavisimaya qazeta” nəşrində dərc edilən məqaləsində deyilir. Məqalə Azərbaycanla RF arasında diplomatik münasibətlərin qurulmasının 25 illiyinə həsr olunub.

“Bu gün Rusiya ilə bir çox tərəfdaşlıq əlaqələri sınaqdan keçdiyi halda Azərbaycan-Rusiya münasibətləri bütün sahələri əhatə etməklə intensiv şəkildə inkişaf edir”, - E.Məmmədyarov bildirib.

İki ölkə arasında müqavilə- hüquq bazası 200-dən çox dövlətlərarası, hökumətlərarası və regionlararası sazisi əhatə edir.  Rusiya Azərbaycanın əsas ticarət tərəfdaşlarından biridir.

E. Məmmədyarov qeyd edib ki, Azərbaycan-Rusiya əlaqələri həmçinin üçtərəfli regional əməkdaşlıq formatındakı mexanizmlər vasitəsilə zənginləşir. Nazir bildirib ki, Azərbaycan-Rusiya-İran formatında əməkdaşlıq transregional tərəfdaşlığın inkişafı üçün strateji əhəmiyyətə malikdir.

E. Məmmədyarov iki ölkə arasında humanitar sahədə əməkdaşlığın da inkişaf etdiyini vurğulayıb. Onun sözlərinə görə, mədəniyyətlərarası əməkdaşlığın inkişafında Heydər Əliyev Fondu xüsusi rol oynayır. Fondun yardımı ilə Rusiya ərazisində məktəblər rekonstruksiya olunub, uşaq əyləncə şəhərciyi açılıb, Rusiya-Azərbaycan dostluğu körpüsü inşa edilib, habelə xeyriyyə aksiyalar keçirilir.  

Bakıda M.V.Lomonosov adına MDU-nun filialı, İ.M.Seçenov adına Moskva Dövlət Tibb Universitetinin filialı fəaliyyət göstərir.

E.Məmmədyarov turizm sahəsinə də toxunub. Bu sahənin yaxşı inkişaf perspektivlərinin olduğunu deyən nazir qeyd edib ki, hər il Rusiyadan Azərbaycana gələn turistlərin sayında artım var.

Qarabağ münaqişəsinə toxunan E.Məmmədyarov qeyd edib ki, Azərbaycan ölkənin ərazi bütövlüyünün bərpası işində dünya birliyinin prinsipal mövqeyinə ümid edir. Xüsisi rol sözsüz ki, BMT Təhlükəsizlik Şurasının daimi üzvü, ATƏT-in Minsk Qrupunun həmsədri kimi Rusiyanındır.  Rusiya prezidenti Vladimir Putinin təşəbbüsü ilə Sankt-Peterburqda Azərbaycan və Ermənistan prezidentləri İlham Əliyevlə  Serj Sarkisyan arasında aparılan danışıqlar erməni qüvvələrinin Azərbaycanın işğal edilmiş ərazilərindən çıxarılması məsələsinin həllini tapacağına müəyyən ümidlər doğurmuşdu. Ancaq təəssüf ki, bu görüşdən sonra Ermənistan müxtəlif bəhanələrlə danışıqların davam etdirilməsindən yayınır.06D--