Elmar Məmmədyarov Tomas Melia ilə görüşüb

Azərbaycanın xarici işlər naziri Elmar Məmmədyarov dekabrın 4-5-də  İsveçrənin Bazel şəhərində keçirilən ATƏT-in 21-ci Nazirlər Şurasının iclasında iştirakı çərçivəsində ABŞ dövlət katibinin demokratiya, insan haqları və əmək məsələləri üzrə köməkçisinin müavini Tomas Melia ilə görüşüb.

XİN-in mətbuat xidmətinin məlumatında deyilir ki, görüş zamanı vətəndaş cəmiyyətinin inkişafı və regional məsələlər ətrafında fikir mübadiləsi aparılıb.

E. Məmmədyarov Azərbaycanda vətəndaş cəmiyyətinin dinamik surətdə inkişaf etdiyini, dövlət tərəfindən bu sahənin inkişafına hərtərəfli dəstəyin göstərildiyini və ardıcıl demokratik islahatların həyata keçirildiyini qeyd edib.

İnsan hüquqlarından danışarkən nazir Ermənistanın Azərbaycana qarşı təcavüzü nəticəsində ən əsas hüquqlarından məhrum olan və etnik təmizləməyə məruz qalan bir milyondan artıq azərbaycanlı qaçqın və məcburi köçkünün pozulmuş hüquqlarının bərpa edilməsinə lazımı diqqət yetirilməsinin vacibliyini diqqətə çəkib. O əlavə edib ki, azərbaycanlı qaçqın və məcburi köçkünlərin insan hüquqlarının qorunmasına dair fundamental beynəlxalq sənədlərdə təsbit olunmuş ən ümdə hüquqları, o cümlədən yaşamaq hüququ kobud şəkildə pozulub.

Beynəlxalq ictimaiyyətin bu məsələdə fəal mövqe nümayiş etdirməli olduğunu deyən  E. Məmmədyarov ABŞ-ın azərbaycanlı qaçqın və məcburi köçkünlərin hüquqları məsələsinin müxtəlif formatlarda gündəmdə saxlanmasının münaqişənin həllinə töhfə verə biləcəyini deyib.

2013-cü il prezident seçkiləri ərəfəsində Azərbaycan hakimiyyəti Melianı qəbul etməkdən imtina etmişdi və onun regional turne çərçivəsində Bakıya səfəri baş tutmamışdı. Bu, Melianın həmin ilin yazında Azərbaycana əvvəlki səfəri zamanı insan haqlarının pozulmasını və vətəndaş cəmiyyətinə təzyiqləri kəskin tənqid etdiyinə görə baş vermişdi.

O, Azərbaycanın hökumətynlü KİV-də hücumlara məruz qalmışdı.

Bundan sonra oktyabrda ABŞ prezidenti Barak Obama Azərbaycanı vətəndaş cəmiyyətinin inkişafı üçün böyük problemlərin yaradıldığı ölkələr sırasına daxil edib. Melia yenidən Bakıya səfərinin mümkünlüyünü bildirib.  –06D--