Əməkdaşlıq Mərkəzi aksiyalarla həmrəy olduğunu bildirir

Bakı/15.01.16/Tuarn: “Azadlıq” Siyasi Partiyaların Əməkdaşlıq Mərkəzi (SPƏM) yanvarın 15-də Klassik Xalq Cəbhəsi Partiyasının (KXCP) qərargahında “Ölkədəki sosial-iqtisadi böhran, yaranma səbəbləri, çıxış yolları” adlı dəyirmi masa keçirib.

Tədbirdə ölkədəki mövcud ictimai-siyasi və sosial-iqtisadi durumla bağlı çıxışlar edilib. Ölkədə vəziyyətin normallaşması üçün iqtidarın bəzi addımlar atmalı olduğu vurğulanıb.

Dövlət başçısı ilə siyasi partiya liderlərinin mövcud durumla dialoqunun təşkili, bahalaşma ilə bağlı rayonlarada keçirilən aksiya zamanı həbs edilənlərin buraxılması, monopoliyanı, rüşvət və korrupsiyanı aradan qaldırmaq üçün struktur və kadr islahatları aparılması, aztəminatlı təbəqənin maraqlarının təmin olunması üçün sosial-müdafiə xarakterli addımlar atması kimi təkliflər səsləndirilib. Partiyalar ayrı-ayrı rayonlarda sosial tələblərlə keçirilən aksiya iştirakçıları ilə həmrəyliklərini ifadə ediblər. Bundan əlavə, partiya rəhbərləri mövcud şəraitdə keçirilən aksiyaların milli maraqlara uyğun nəticə verməsi üçün milli platformada birləşən partiyaların fəaliyyətinin koordinasiya edilməsi vurğulanıb.

Dəyirmi masaya KXCP, Azadlıq, BAP, İDP, Aydınlar, Xalq, AMİP, Dünyəvi Bozqurd, VİP, ALDP, AXP  nümayəndələri və QHT təmsilçiləri qatılıblar.  

Bu qurum 2015-ci ilin noyabrında  keçirilmiş parlament seçkilərindən dərhal sonra  yaranıb. Hazırda qurumun tərkibinə Klassik Xalq Cəbhəsi, Azadlıq,  Böyük Azərbaycan, Aydınlar, Vətəndaş və İnkişaf, Liberal Demokrat partiyaları daxildir. -05C-