Rüfət Səfərov: Həbsdən, ağır işgəncələrdən, ən dözülməz hallardan belə qorxmuram

Zərdab rayon Prokurorluğunun keçmiş müstəntiqi Rüfət Səfərov “Amerikanın Səsi”nə müsahibəsində ona qarşı qaldırılan cinayət işi ilə bağlı münasibətini bildirib. Bu gün Baş Prokuror yanında Korrupsiyaya qarşı Mübarizə Baş idarəsinin rəsisi Kamran Əliyev “Amerikanın Səsi”nin sualının cavabında Rüfət Səfərova qarşı konkret faktlar əsasında rüşvət alma maddəsi ilə cinayət işinin başlandığını bildirib.

Sual: Bu gün Baş Prokuror yanında Korrupsiyaya qarşı Mübarizə Baş İdarəsinin rəisi Kamran Əliyev sizə qarşı rüşvət alma ittihamı ilə konkret faktlar əsasında cinayət işi qaldırıldığını bildirib. Buna münasibətiniz necədir?

Cavab: Əvvəla qeyd edim ki, xidməti fəaliyyətdə olarkən mənim barəmdə şikayətlər Korrpusiyaya qarşı Mübarizə İdarəsinə daxil olmayıb. Nədənsə bu, siyasi bəyanatla istefa verib xalqın tərəfinə keçəndən sonra baş verib. Təbii ki, mən tərəfdən bu, absurd qiymətləndirilir. İrəli sürüləcək ittihamı qəbul etmir, sırf siyasi motivlərlə əlaqələndirirəm. Yaşayaq görək, ittihamla tanış olaq. Hələ ki, şahid, şübhəli, yaxud təqsirləndirilən şəxs statusunda hər-hansı bir dəvət almamışam. Yaşayaq görək, nəticəni xalqla birgə paylaşacağıq, inşallah.

Sual: Bu cinayət işi qaldırıldıqdan sonra hansı hərəkətlərə baş vurmaq fikrindəsiniz?

Cavab: Yəqin ki, məlumatınız var, iki gün öncə Zərdab əhalisinə mənim bir müraciətim oldu, onu ölkə mediası yayımladı. Çox güman ki, mənim keçmiş həmkarlarımın səbr-kasasını daşıran o müraciət olub.  Lakin mən “Amerikanın Səsi” vasitəsi ilə dünyaya elan edirəm ki, hər-hansı bir həbsdən, ağır işgəncələrdən, ən dözülməz hallardan belə qorxmuram. Buna həm psixoloji, həm də fiziki formada hazıram. Mənim yeganə güvənc yerim xalqımdır. Bunlardan heç bir haqq-ədalət gözləmirəm. Çünki ölkədəki hüquq-mühafizə orqanlarının, məhkəmə hakimiyyətinin hansı acınacaqlı durumda olduğuna mən bələdəm. Yalnız xalqıma güvənirəm və çox güman ki, xalqla bərabər addımlayacağıq. 

Sual: Dedilər ki, sizə qarşı cinayət işi konkret faktlar əsasında qaldırılıb. Belə faktlar nə qədər realdır?

Cavab: Məndən ötrü bu, gülünc xarakterlidir. Mən bir daha xatırladıram, beş il müddətində prokurorluq orqanlarında çalışmışam. Necə ola bilir ki, Zərdab rayon Prokuroluğunun müstəntiqi olarkən bu məzmunlu şikayətlər Korrupsiyaya qarşı Mübarizə İdarəsinə daxil olmayıb, mən istefa verib xalqın tərəfinə keçəndən sonra bu hallar meydana çıxıb. Bunun özü göstərir ki, sırf qərəzli, qeyri-obyektiv və əsassız ittihamdır. Bunu dərk etmək üçün məncə hüquqşünas olmağa ehtiyac yoxdur.

Sual: Hər-hansı siyasi partiyaya və ya hərəkata üzv olacağınız barədə nə deyə bilərsiniz? Olacaqsınızmı?

Cavab: Bu günlərdə bu barədə bir neçə dəfə anoloji suallarla qarşılaşmışam. Düşünürəm ki, Azərbaycanda siyasi fəaliyyətlə məşğul olmaq üçün hər-hansı siyasi partiyaya və ya hərəkata üzv olmaq vacib deyildir. Müstəqil şəxs kimi, müstəqil hüquqşünas olaraq, vətəndaş olaraq öz fikirlərimi bildirmişəm. Bundan sonra da şəxsi düşüncələrimi paylaşacağam. Çox güman ki, sərbəst vətəndaş olaraq bundan sonra mübarizəmin arxasında olacağam.

Sual: Hökumətə, hüquq-mühafizə orqanlarına, cinayət işini qaldıran orqana sözünüz varmı?

Cavab: Sözüm cənab baş prokuror Zakir Qaralovadır. Çox güman ki, bu cinayət işi ilə bağlı biz yaxın bir neçə ildə işləyəcəyik. Baş prokurorun nəzərinə çatdırmaq istəyirəm ki, həm o, həm də mən bir məsələni unutmayaq. Biz tarix üçün çalışırıq. Bu, vacib məsələdir, bunu unutmayaq. Tarix hər bir məsələyə xırdalığına qədər öz dəyərini verəcəkdir. -0-