Emin İbrahimovu digər məhbuslardan ayırıblar və yaxınları ilə görüş veriblər

Keçmiş diplomat Emin İbrahimov 7 gündür ki, 1 saylı Şüvəlan İstintaq Təcridxanasında aclıq edir. Bu barədə Turan-a vəkil Bəhruz Bayramov iyulun 30-da onunla görüşdən sonra bildirib. Vəkil qeyd edib ki, İbrahimov 16 məhbusun, o cümlədən residivistlərdən olduğu kameradan ayrı kameraya köçürülüb.

Hazırda İbrahimov tək saxlanılır, ancaq onu tibbi nəzarətə götürməyiblər.

Xatırladaq ki, iyulun 29-da Apellyasiya Məhkəməsində İbrahimov bildirib ki, o, residivistlərlə birlikdə dolu kamerada saxlanılır, onların vasitəsilə  təsir göstərərək aclığı dayandırmasını tələb edirlər. İbrahimovun sözlərinə görə, digər məhbusları siqaret, görüşlər, telefon danışıqlarından məhrum ediblər. İstintaq təcridxanasının administrasiyası səbəb kimi İbrahimovun aclıq etdiyini göstərib və digər məhbuslardan İbrahimovu aclığı dayandırmağa məcbur etməyi tələb edib.

Bu gün İbrahimova anası və qardaşı ilə görüş verilib, lakin ona qarşı cinayət işi bağlanmayınca aclığı dayandırmaq niyyətində deyil.

Vəkil qeyd edib ki, müdafiə tərəfi həbs qətimkan tədbirinin ev dustaqlığı ilə dəyişdirilməsi barədə vəsatət qaldıracaq.

Öz növbəsində Penitensiar Xidmətin ictimai əlaqələr şöbəsi bildirib ki, Emin İbrahimov barəsində cinayət işinin başlanmasına etiraz əlaməti olaraq aclıq etməsilə bağlı ərizə ilə 28.07.2024-cü il tarixində müraciət edib, 29.07.2024-cü il tarixində  vəkili Aqil Layıcın müraciəti əsasında məhkəmə iclasında iştirak etmək üçün Bakı Apellyasiya Məhkəməsinə müşayiət edilib. İbrahimov daha sonra təcridxanaya qaytarılıb və müraciəti əsasında qanunauyğun olaraq tədbirlər həyata keçirilib.

“İbrahimovun yaxın qohumları ilə görüş hüququ məhdudlaşdırılmayıb, telefonla danışmaq hüququndan istifadə edib. Ona qarşı təzyiqlərin olması barədə iddia isə həqiqəti əks etdirmir. Belə ki, o işçi heyəti və həbs edilmiş şəxslər tərəfindən təzyiqlərə və işgəncələrə məruz qalmır, hüquqları və qanuni mənafeləri qorunur”, - Penitensiar Xidmətin şərhində deyilir.

* Xatırladaq ki, Emin İbrahimov iyulun 22-də saxlanılıb.

2 gündən sonra Emin İbrahimov  Qaraçuxur qəsəbəsinin sakini Kamal Şükürova bıçaq xəsarəti yetirməkdə ittiham olunub (Cinayət Məcəlləsinin 126.2.4-cü maddəsi, silahdan istifadə etməklə qəsdən sağlamlığa zərər vurma) və 221.1-ci maddə (xuliqanlıq). O bu ittihamları rədd edib və cinayət işini hakimiyyəti tənqid etməsilə əlaqələndirib.

Keçmiş diplomat Emin İbrahimov 2007- 2020-ci illərdə diplomatik xidmətdə olub. 2012-2016-cı illərdə Azərbaycanın ABŞ-dakı səfirliyinin ikinci katibi, 2016-2020-ci illərdə Uruqvayda müvəqqəti işlər vəkili olub.

13 Mart 2020-ci ildə ölkədə seçki hüququ və azadlıqların yatırılmasına etiraz olaraq Xarici İşlər Nazirliyinə istefa ərizəsi verib və diplomatik fəaliyyətindən gedib. Bundan sonra  vətəndaşların hüquqlarının pozulmasına və saxtakarlığa görə Azərbaycan hakimiyyətini tənqid edib, KİV və sosial şəbəkələrdə çıxış edib.