Ərdoğan hökumətini istefa gözləyir

Hökumət üzvləri arasında korrupsiya faktının aşkarlanmasına görə 5 polis komissarı və 10-a yaxın zabit öz postundan azad edilib. Türkiyə KİV-nin məlumatına görə, Ərdoğan hökuməti korrupsiya, qaçaqmalçılıq, pulların yuyulmasında əli olan onlarla adamı aşkar edərək həbs edən polis əməkdaşlarından qisas almağa başlayıb. “Bu, çirkin əməliyyat idi”, “biz bu barədə heç nə bilmirdik və bunun arxasında kim durursa aşkar ediləcək”, baş nazirin rəyi belədir. Ərdoğan öz nazirlərinin davranışı ilə bağlı bir kəlmə deməyib və korrupsiya faktını qiymətləndirməyib. Halbuki, Qəzi parkı məsələsində “xarici iz” axtarmağa çalışırdı.

Onun müavini Bülənt Arınç daha konkret çıxış edib. O deyib ki, 14 ay ərzində polis həbs olunanları dinləyib və izləyib. “Hökumət heç nə bilmirdi. Bunda əli olanlar açıqlama verməlidir”, - Arınç hiddətlənib. O, korrupsiyada əli olan nazirlərin istefa verəcəyini istisna etməyib.

Öz növbəsində müxalifət liderləri Ərdoğanın və onun hökumətinin hərəkətlərini yolverilməz və qanunsuz adlandırıblar. “Biz korrupsionerləri ifşa edən polislərin tərəfindəyik və onları müdafiə edəcəyik”, - CHP aparıcı müxalifət partiyasının lidero Kılıçdaroğlu bildirib. Onun sözlərinə görə, özünü hüquqi adlandıran hökumət vətəndaşların maraqlarını müdafiə etməlidir, korrupsionerləri cəzalandırmalıdır, onları ifşa edənləri yox.

Dekabrın 19-u səhərə olan məlumata görə, 42 nəfər həbsdədir, 10 nəfərdən çıxmamaq barədə iltizam alınıb.

Lakin polislərə təqiblərə son qoyulmayıb. Belə ki, İzmirdə 6 polis zabiti öz vəzifəsindən çıxarılıb. Onlar da korrupsiya üzrə araşdırma aparırdı.

Ekspertlər istisna etmirlər ki, Sədərək gömrüyünün rəisi Mirməhəmməd Seyidovun həbsi Azərbaycan vətəndaşlarının da Türkiyədə korrupsiya və pulların yuyulması faktlarına bağlılığından xəbər verir. Siyasi duruma gəlincə, müşahidəçilərin bir çoxu hökumətin, ola bilsin ki, Ərdoğanın özünün də istefaya gedəcəyini proqnozlaşdırır. Lakin bu, könüllü yox, ictimaiyyətin təzyiqləri altında baş verəcək. Türkiyədəki mənbələr bildirirlər ki, ölkə ictimaiyyəti hökumət üzvləri tərəfindən korrupsiyanın və ölkənin daxili işlər nazirinin oğlunun cəlb olunduğu maxinasiyaların miqyasından şoka düşüblər. Buna baxmayaraq, Ərdoğan onu istefaya göndərməyib. -02V-