Erdoğan: Qazaxıstanın təhlükəsizliyinin, sabitliyinin, ərazi bütövlüyünün təmin edilməsi xüsusi əhəmiyyət qazanır

Astana/12.10.22/Turan: Çərşənbə günü Astanada Asiyada Qarşılıqlı Əlaqələr və Etimad Tədbirlərinə həsr olunmuş Müşavirənin 6-cı iclası ərəfəsində Qazaxıstan və Türkiyə prezidentləri Kasım-Jomart Tokayev və Recep Tayyip Erdoğan yüksək səviyyədə strateji əməkdaşlıq şurasının IV iclasını keçiriblər.

"İclasın gündəliyinə beş məsələ daxil edilib: xarici siyasət və investisiyalar, ticari-iqtisadi əməkdaşlıq, nəqliyyat və logistika, hərbi sənaye, energetika və kənd təsərrüfatı", deyə Akorda mətbuat xidmətinin məlumatında bildirilir.

"Bizim məqsədimiz qarşılıqlı ticarət dövriyyəsini 10 mlrd. dollara çatdırmaqdır. Son 15 ildə Ankara Qazaxıstana 4,35 mlrd. dollar investisiya yatırıb. Ölkəmiz isə Türkiyəyə 1,13 mlrd. dollar yatırıb. Türkiyə Qazaxıstanın 10 ən böyük investoru siyahısına daxildir. Ümumilikdə, tranzit-nəqliyyat əlaqələri ikitərəfli ticarət potensialının artırılmasında mühüm rol oynayır. Biz daşıma xərclərini və çatdırılma müddətini azaltmaq üçün Transxəzər dəhlizini inkişaf etdirməyə çağırırıq. Bugünki görüşdə biz bu məsələni müzakirə etdik və ortaq fikrə gəldik. Bu ilin iyununda Bakıda üçtərəfli formatda görüş keçiriləcək. Biz bu ənənəni davam etdirmək niyyətindəyik. Növbəti görüşü Aktauda keçirməyi təklif edirik", deyə Tokayev bildirib.

Türkiyə prezidenti şəxsən öz adından və nümayəndə heyətinin adından qazax xalqına qonaqpərvərliyi üçün təşəkkürünü bildirib və iki ölkə arasında bütün sahələrdə əməkdaşlığı inkişaf etdirməkdə maraqlı olduğunu qeyd edib.

"Biz Qazaxıstan iqtisadiyyatının şaxələndirilməsində iştirak edirik. Əminəm ki, bizim şirkətlərimiz də xalqın məşğulluğunun təmin edilməsinə yönəlmiş təşəbbüslərin həyata keçirilməsinə töhfə verəcək. Ticarət dövriyyəsini qısa müddətdə 5 mlrd. dollara, orta müddətdə 10 mlrd. dollara çatdırmaq barədə razılıq əldə etdik. Hələlik hər şey plana uyğun gedir. Nəqliyyat-logistika sahəsində əməkdaşlığımız bizim qısa müddətdə ortamüddətli dövr üçün nəzərdə tutulan nəticələr əldə etməyimizə imkan verir. Xəzərin əhəmiyyəti artır. Bakıda üçtərəfli görüş uğurlu keçib. Ümid edirik ki, Aktaudakı görüş bu işi irəlilətməyə imkan verəcək. Biz dünya ictimaiyyəti qarşısında qlobal ərzaq təhlükəsizliyinin təmin edilməsi üzrə öhdəliklərimizi lazımi səviyyədə yerinə yetiririk. Hesab edirəm ki, bu mənada Qazaxıstanın zəngin buğda potensialından istifadə etmək olar", deyə Erdoğan bildirib.

Türkiyə prezidenti həmçinin qeyd edib ki, qlobal və regional qeyri-sabitlik dövründə türk dövlətlərinin qarşılıqlı fəaliyyətini möhkəmləndirmək tələb olunur, buna görə də Qazaxıstanın - Türkiyənin qardaşı və strateji tərəfdaşı olan ölkənin təhlükəsizliyinin, sabitliyinin, ərazi bütövlüyünün təmin edilməsi və iqtisadi rifahının artırılması xüsusi əhəmiyyət qazanır.

Danışıqların yekunlarına görə dövlət başçılarının iştirakı ilə rəsmi nümayəndə heyətləri tərəfindən aşağıdakı sənədlər imzalanıb: səhiyyə sahəsində əməkdaşlıq haqqında saziş; baytarlıq və qida təhlükəsizliyi sahəsində saziş; muzey işi, abidələrin qorunması və bərpası sahəsində əməkdaşlıq haqqında memorandum, texniki tənzimləmə, standartlaşdırma, metrologiya, akkreditasiya və uyğunluğun qiymətləndirilməsi sahəsində qarşılıqlı anlaşma və əməkdaşlıq memorandumu; ailə məsələləri və sosial xidmətlər üzrə qarşılıqlı anlaşma və əməkdaşlıq haqqında memorandum.

"Qazaxıstan Respublikası və Türkiyə Respublikası arasında ikitərəfli münasibətlərin möhkəmləndirilməsinə və inkişafına verdiyi böyük töhfəyə görə Tokayev Erdoğan prezidentini I dərəcəli "Dostık" ("Dostluq") ordeni ilə təltif edib. 0