Erdoğan Türkiyədə müstəqil media dairəsini daraldır

“Anadolu” xəbər agentliyi rəhbərliyinə keçmiş baş nazir Erdoğanın mətbuat xidmətində işləyən Şenol Kazançı gətirilir.

Ş.Kazançı 1975-ci ildə İstanbulda anadan olub, əslən Trabzonludur. Öncə Kartal Anadolu İmam Hatip (dini təhsil) məktəbini, daha sonra İstanbul universiteti hüquq fakultəsini bitirib.

2011-ci ilə kimi Erdoğan hakimiyyətinin yanında olan “Yeni Şafak” qəzetində çalışıb. 2011-ci ildən Erdoğanın mətbuat xidmətində çalışıb.

Ş.Kazançının sələfi, agentliyin əvvəlki rəhbəri Kamal Öztürk 1969-cu ildə Sakaryada anadan olub, Marmara universitetini bitirib, 2011-ci ildən 2014-cü ilin dekabrına kimi agentliyə rəhbrəlik edib.

Agentlik özü isə 1920-ci ildə Türkiyənin qurucusu Mustafa Kamal Atatürkün qərarı ilə yaradılıb.

Ş.Kazançının agent rəhbərliyinə gətirilməsi qurumun ölkə hadisələrinə münasibətdə tərəfsizliyini əldən verəcəyi, indiki Türkiyə iqtidarının müdafiəçisi kimi çıxış edəcəyi kimi dəyərləndirilir.

Hətta Ş.Kazançının rəhbər vəzifəyə gətirilməsilə bağlı şərhlər belə özündə müsbət bir çalar əks etdirmir. Müxtəlif düşüncəyə malik insanlar bu şəxsin agentliyə rəhbər gətirilməsini “iqtidarın medianı ələ almaqda davam etməsi”, “iqtidarın adamlarını müxtəlif sahələrə yerləşdirməsi”, “hər yerə öz adamlarını qoymaqla haqlı olacaqsanmı, dövlətin lazlarla (bəziləri Erdoğanın milli mənsubiyyətcə laz olduğunu iddia edir) doldurulması, haqlının haqqının yeyilməsi, özünə də müsəlman deməsi?”, “AA xəbərin də AK (hakim partiyanın abbreviaturası) xəbər olması” kimi dəyərləndirirlər. -05D-