Erdoğan: Ukrayna böhranının dinc həlli Ukraynanın ərazi bütövlüyünün və suverenliyinin qorunub saxlanması əsasında tapıla bilər

Bakı/19.04.22/Turan: Türkiyə Ukraynada hərbi əməliyyatların dayandırılmasına və Moskva və Kiyev arasında sabit sülhə nail olunmasına yönəlmiş bütün zəruri səyləri davam etdirəcək. Bu barədə Türkiyə prezidenti Recep Tayyip Erdoğan aprelin 18-də Ankarada xarici diplomatik missiya rəhbərləri üçün təşkil edilmiş iftar proqramında çıxış edərkən bildirib.

"Qonşularımız arasında barışığa, daha sonra isə sabit sülhə nail olmaq insanlıq naminə görülmüş ən yaxşı işlərdən biri olacaq", deyə Türkiyə lideri bildirib.

Anadolu Agentliyinin məlumatına görə, Erdoğan təəssüflə qeyd edib ki, Ukraynada dinc sakinlərə hücumlar Moskva və Kiyev arasında Ankaranın vasitəçiliyi ilə aparılan danışıqların uğurlu gedişatını ləngidib. "Tərəflər danışıqlarda hiss olunan irəliləyişə nail olublar, amma Buça və İrpendən gələn kadrlar, Kramatorskun dinc sakinlərinin hədəf alınması bizim səylərimizə kölgə salır", deyə o qeyd edib.

Türkiyənin İstanbulda Rusiya-Ukrayna danışıqlarında "tərəflər və beynəlxalq ictimaiyyət üçün qənaətbəxş" nəticə əldə etmək üçün səyləri davam etdirəcəyini vurğulayan Erdoğan Ukrayna böhranının dinc həllinin dialoq yolu ilə və Ukraynanın ərazi bütövlüyünün və suverenliyinin qorunub saxlanması əsasında tapıla biləcəyindən əminliyini ifadə edib. -0-