Erməni hərbiçilərin işi üzrə məhkəmə davam edir

Bakı/09.06.21/Turan: İyunun 9-da Yasamal rayon məhkəməsində Bakı Hərbi Məhkəməsinin hakimi Elbəy Allahverdiyevin sədrliyi ilə erməni hərbiçilər Lüdvik Mkrtıçyan və Alyoşa Xosrovyanın işi üzrə proses davam edir. Onlar Birinci Qarabağ müharibəsi zamanı cinayət törətməkdə ittiham olunurlar.

Bu Ermənistan vətəndaşları 90-cı illərin əvvəllərində Qarabağda azərbaycanlı əsirlərə işgəncə verməkdə və onları qətl etməkdə təqsirli bilinirlər.

Bu gün şahidlərin və zərərçəkmişlərin – azərbaycanlı keçmiş hərbi əsir və müttəhimlərin qurbanlarının ifadələri dinlənilib.

Müttəhimlər özləri irəli sürülmüş ittihamlarla özlərini təqsirli bilməyiblər. Yalnız Xosrovyan Azərbaycan sərhədini keçdiyini etiraf edib.

Amma zərərçəkmişlər bu iddiaları təkzib ediblər və məhkəməyə işgəncə faktları barədə danışıblar. Belə ki, hərbi qulluqçu Elşən İslamov bildirib ki, 1998-2000-ci illərdə erməni əsirliyində olub. Şuşada və Yerevanda müttəhimlərdən biri onu dindirib və ona işgəncə verib. O, bu şəxsi dərhal tanıyıb.

Digər zərərçəkmiş Cavid Hüseyn ifadəsində bildirib ki, 1994-cü ildə Ağdam rayonunda əsir düşüb. Müttəhimlər Şuşa həbsxanasında ona işgəncə veriblər, onu metal çubuqla döyüblər. 

Qırmızı Xaç Komitəsinin əməkdaşları həbsxanaya baş çəkərkən işgəncə izlərini gizləmək üçün onu gizlədirdilər.

Vaxtilə Şuşa həbsxanasında saxlanılmış Qərib Vəliyev də buna bənzər ifadə verib.

* Lüdvik Mkrtıçyan 2020-ci il oktyabrın 20-də Füzuli rayonunda, Alyoşa Xosrovyan isə həmin il oktyabrın 3-də Azərbaycan ərazisində saxlanılıb.

Hər ikisinə qarşı Azərbaycan Cinayət Məcəlləsinin 113 (işgəncə), 115.2 (müharibə qanunlarını və adətlərini pozma), 279.1 (qanunvericiliklə nəzərdə tutulmayan silahlı birləşmələri və ya qrupları yaratma), 318.2 (Azərbaycan Respublikasının dövlət sərhədini qanunsuz olaraq keçmə) maddələri ilə ittiham irəli sürülüb. -0-