Erməni ordusunda ölümlərin səbəbi - kriminal psixologiyanın üstünlüyü

Bakı/19.02.20/Turan: Dünən Ermənistanın baş naziri Nikol Paşinyan erməni ordusunda əsgərlərin kütləvi ölümü məsələsi ilə bağlı qapalı müşavirə keçirib. Müşavirə başa çatdıqdan sonra Paşinyan Facebook səhifəsində yazıb ki, bir sıra mühüm qərarlar, o cümlədən kadrlarla bağlı qərarlar qəbul edilib.

Fevralın 19-da Paşinyan Müdafiə Nazirliyinin iki idarəsinin rəislərinin - hərbi polis rəisi Artur Baqdasaryanın və şəxsi heyətlə iş idarəsinin rəisi Alik Aleksanyanın ordudan qovulması haqqında təkliflərini ölkə prezidentinə təqdim edib.

Erməni KİV-lərinin məlumatına görə, Qarabağ qüvvələrinin komandanı Karen Abramyan da vəzifəsindən azad ediləcək, onun yerini qərargah rəisi Calal Arutyunyan tutacaq.

Rəsmi məlumatlara görə, ilin əvvəllərindən erməni ordusunda qeyri-döyüş şəraitində 13 əsgər və zabit həlak olub. Əsas səbəb "dedovşina", daha dəqiq isə başqalarını qorxuya salan yüksək vəzifəli hərbiçilərin və məmurların övladlarının ordudakı nüfuzudur.

KİV-lərin məlumatına görə, Qarabağda məmurların övladları ön cəbhədə xidmət etmir, cəbhə xəttində isə əsgərlərdən pul qoparan kiçik zabitlərin özbaşınalığı hökm sürür.

Digər bir ciddi problem orduda kriminal psixologiyanın mövcudluğudur, Baş Qərargah rəisi Artak Davtyanın sözlərinə görə, ordudakı intiharların səbəblərindən biri də budur. -02D-