Erməni podpolkovniki Azərbaycana minaların xəritəsini təklif edir

Bakı/07.06.21/Turan: Erməni zabiti Koryun Gumaşyan Erməmistanın Noyan Tapan agentliyinə videomüsahibəsində deyib ki, Kəlbəcər və Laçında cox sayda minalar bastırıblar. Podpolkovnikin sözlərinə görə, onlar 17 maşın dolu mina basdırıblar.

O, təklif edib ki, Azərbaycan erməni əsirlərini onlara qaytarsın, əvəzində Gumaşyan minaların xəritəsini Bakıya verəcək.

Azərbaycan Müdafiə Nazirliyi Turan agentliyinə bu xəbərə münasibət bildiriləcəyini deyib.

Bu il aprelin 30-da Azərbaycanın xarici işlər naziri Ceyhun Bayramov bildirib ki, 2020-ci il noyabrın 10-dan 2021-ci il aprelin 30-dək mina partlayışı nəticəsində 22 nəfər həlak olub, 100 nəfər yaralanıb.

Bununla yanaşı, son günlər mina partlaması nəticəsində ikisi jurnalist olmaqla, daha 3 mülki şəxs həlak olub, bir neçə nəfər yaralanıb.

Rəsmi statistikaya görə, 2020-ci il də daxil olmaqla, Azərbaycanda 2439 nəfər müharibənin təhlükəli partlayıcı qalıqlarından zərər çəkib, onlardan 383 nəfər ölüb və 2056 nəfər yaralanıb.

Azərbaycanın azad edilmiş ərazisinin hazırda ermənilər yaşayan hissəsində Rusiya Müdafiə Nazirliyi, azərbaycanlıların yaşadığı hissədə isə Azərbaycan Minatəmizləmə Agentliyi, Azərbaycan, Rusiya və Türkiyə hərbi istehkamçıları minatəmizləmə işlərini həyata keçirir.

Ekspertlərin fikrincə, azad edilmiş ərazilərdə yüz mindən çox mina var. -0-