Ermənistan-Azərbaycan sərhədində insident Yerevanın təxribatıdır - İ.Əliyev

Bakı/12.04.23/Turan: Aprelin 11-də Ermənistan-Azərbaycan sərhədində baş verən silahlı insident Ermənistan tərəfindən məqsədyönlü şəkildə törədilmiş təxribat idi. Bu barədə İlham Əliyev ATƏT-in fəaliyyətdə olan sədri, Şimali Makedoniya Respublikasının xarici işlər naziri Buyar Osmani ilə görüşdə bildirib.

Əliyev Şimali Makedoniyanın və ümumilikdə Balkan regionunun etnik barışıq konsepsiyasının, reinteqrasiya və inklüziv cəmiyyətin yaradılması təcrübəsinin Cənubi Qafqaz üçün də maraqlı ola biləcəyini qeyd edib. 

Ermənistan-Azərbaycan münaqişəsinə toxunan prezident Bakı və Yerevan arasında sülh prosesinin davam etdiyini bildirib. 

Azərbaycan Qarabağ ermənilərinin nümayəndələri ilə birbaşa görüşlər təklif edib və xüsusi nümayəndə təyin edib.

Eyni zamanda, Yerevanla münasibətlərin normallaşdırılması və sülh müqaviləsinin bağlanması ilə bağlı danışıqlar aparılır. 

Osmani ATƏT-in minatəmizləmə prosesinə və digər humanitar məsələlərin həllinə verə biləcəyi töhfədən bəhs edib. 

Əliyev həmçinin Orta Dəhliz konsepsiyası çərçivəsində təcrübi əməkdaşlıq layihələrinin həyata keçirilməsi imkanlarını qeyd edib.

Görüşdə Azərbaycan və Şimali Makedoniya arasında nəqliyyat, energetika sahəsində əməkdaşlıq və qarşılıqlı maraq doğuran digər məsələlər müzakirə olunub. 06B