Ermənistan əsirləri “hamını hamı ilə” prinsipi üzrə dəyişdirməyəcəyini göstərir

Bakı/02.09.20/Turan: Erməni zabiti Qurgen Alaverdyan əsir düşdükdən sonra növbəti dəfə bütün erməni hərbi əsirlərinin Ermənistan əsirliyində olan azərbaycanlılarla dəyişdirilməsi məsələsi aktuallaşıb.

Ermənistan tərəfi ermənilərin işğal etdiyi Kəlbəcər rayonu ərazisində əsir düşmüş iki Kəlbəcər sakini – Dilqəm Əsgərov və Şahbaz Quliyevi təhvil verməkdən imtina edirdi. Yerevan onları yeniyetməni qətlə yetirən diversiyaçı hesab edir.

Bu gün rəsmi Yerevan mövqeyinin dəyişmədiyini və Ermənistanın Əsgərovu və Quliyevi öz hərbiçiləri ilə dəyişdirməyəcəyini göstərib.

Belə ki, XİN-in mətbuat katibi Anna Naqdalyan çərşənbə günü keçirilən brifinqdə bildirib ki, Azərbaycanda “müəyyən edilməmiş şəraitdə” əsir düşən şəxslərə qarşı qondarma ittihamlar irəli sürülür.

“Azərbaycan iki vətəndaşını - yetkinlik yaşına çatmamış Smbat Tsakanyanın qatillərini geri almaq istəyir. Yetkinlik yaşına çatmamış şəxsin öldürülməsi istənilən cəmiyyətdə ağır cinayətdir. Zənnimcə, cavab kifayət qədər aydındır”, deyə Naqdalyan bildirib. -02D-