Ermənistan tərəfi iki nəfərin öldüyünü, bir nəfərin yaralandığını bildirib /YENİLƏNİB/

Bakı/01.09.23/Turan: Azərbaycan tərəfdən Ermənistanın Zod rayonunda yerləşən mövqelərinə açılan atəş nəticəsində iki erməni hərbiçisi ölüb, bir nəfər yaralanıb. Bu barədə sentyabrın 1-də səhər Ermənistan Müdafiə Nazirliyi məlumat yayıb.

Ermənistan tərəfin iddiasına görə, Azərbaycan SQ bu istiqamətdə minaatanlardan istifadə edib. 02D

*   *   *

2023 Sentyabr 01 (Cümə) 11:05:49

Kəlbəcər istiqamətində daha iki Azərbaycan hərbiçisi yaralanıb /YENİLƏNİB/

Bakı/01.09.23/Turan: Senyabrın 1-i səhər saatlarında Ermənistan silahlı qüvvələrinin Basarkeçər rayonunun Zod istiqamətindəki bölmələri tərəfindən Azərbaycan Ordusunun Kəlbəcər rayonu ərazisində yerləşən mövqelərinə qarşı zərbə PUA-sı tətbiq edilib.

Nəticədə daha iki hərbi qulluqçumuz yaralanıb.

Azərbaycan tərəfi hazırda qeyd olunan istiqamətdə qətiyyətli cavab tədbirləri görür, bu barədə Müdafiə Nazirliyinin məlumatında deyilir. 0

* * *

Kəlbəcərdə atışma gedir, Azərbaycan hərbiçisi yaralanıb

Bakı 01.09.23/Turan: Ermənistan ərazisindəki mövqelərdən açılan atəş nəticəsində Azərbaycanın Kəlbəcər rayonunda əsgər Tağıyev Məhəmməd Ramiz oğlu yaralanıb, xəbəri Azərbaycan Müdafiə Nazirliyi yayıb.

Yaralanan hərbi qulluqçuya dərhal ilkin tibbi yardım göstərilib və o, hərbi tibb müəssisəsinə təxliyə edilib.

Sentyabrın 1-i səhər saatlarına olan məlumata görə, bu istiqamətdə Azərbaycan ordusunun mövqelərinin atəşə tutulması davam edir. Azərbaycan SQ tərəfindən cavab tədbirləri görülür.

"Ermənistan tərəfinin törətdiyi təxribatın nəticələrinə görə bütün məsuliyyət məhz bu ölkənin hərbi-siyasi rəhbərliyinin üzərinə düşür", deyə məlumatda bildirilir.

Qeyd edək ki, bu istiqamətdə dünən axşam atışma qeydə alınıb.

Eyni zamanda Ermənistan tərəfi Naxçıvanın Ordubad rayonu istiqamətində Azərbaycan mövqelərinə atəş açıb. 06D