Ermənistan XİN ATƏT MQ ölkələrindən erməni əsirlərin azad edilməsində köməklik istəyir

Bakı/20.01.21/Turan: Ermənistanın XİN başçısı Ara Ayvazyan yanvarın 20-də Ermənistanda ATƏT-in Minsk Qrupunun həmsədri olan ölkələrin səfirləri ilə görüşdə onlardan erməni hərbi əsirlərin azad edilməsində köməklik istəyib.

Ermənistan KİV-lərinin məlumatına görə, Ayvazyan həmçinin Qarabağda regionun erməni əhalisinin ehtiyacları ilə bağlı humanitar məsələlərin həllində yardım istəyib. Bununla əlaqədar o, beynəlxalq qurumların, o cümlədən BMT-nin bu məsələlərin həllində iştirakının əhəmiyyətini qeyd edib.

Ayvazyan səfirlərin diqqətini Azərbaycanın nəzarəti altında qalan ərazilərdə erməni tarixi-mədəni və dini irsinin qorunub saxlanılması məsələlərinin aktuallığına çəkib.

Rəsmi Bakı müharibə əsirlərinin “Hamı hamı ilə” prinsipi ilə dəyişdirildiyini bildirir. 44 müharibə əsiri Ermənistan tərəfə, 12 nəfər isə Azərbaycan tərəfinə təhvil verilib. 2019-cu il noyabrın 10-da müharibənin başa çatmasına dair Rusiyanın vasitəçiliyi ilə Azərbaycan və Ermənistan arasında imzalanmış Bəyanatdan sonra Azərbaycan ərazisində saxlanılmış Ermənistan hərbiçilərini Bakı bu sənədin şamil olunmadığı diversantlar hesab edir.

Rəsmi Bakı həmçinin azad edilmiş ərazilərdə bütün tarixi, mədəni və dini abidələrin qanuna uyğun olaraq dövləti tərəfindən qorunduğunu bəyan edib. -02D-