Həbsdə olan I qrup əlil quru aclığı davam etdirir

Həbsdə olan ictimai fəal və I qrup əlil Famil Xəlilov noyabrın 28-dən başladığı quru aclığı davam etdirir. O dərman qəbulundan da imtina edib, lakin ağrıları şiddətləndiyindən dekabrın 2-də dərmanlarını qəbul edib. Lakin su və qida qəbulundan hələ də imtina edir.

Bu barədə dekabrın 2-də onunla görüşdən sonra həyat yoldaşı Kiçikxanım Xəlilova Amerikanın Səsinə deyib.

Dekabrın 2-də o, övladı və anası Famil Xəlilovun quru aclığı dayandırması üçün Ədliyyə Nazirliyinin Müalicə müəssisəsində onunla görüşüb.

“Bizə təcridxana rəisi də qoşudu. Lakin Famil azadlığa buraxılana və ya ev dustaqlığı rejiminə keçirilənə qədər qida və su qəbul etməycəyini bildirdi”, o qeyd edib.

Kiçikxanım Xəlilova həyat yoldaşının səhhətinin daha da ağırlaşdığını deyib.

“Famil artıq müstəqil şəkildə yeriyə bilmir.  Onu görüşə əlil arabasında gətirdilər. Çox arıqlayıb, dəri və sümükdən ibarətdir.  Dodaqları qaralıb, gözləri çuxura düşüb. Onun dekabrın 12-nə təyin edilmiş növbəti məhkəmə iclasına qədər yaşaması çətin görünür. Nə edəcəyimizi bilmirik. Famili itirməkdən qorxuruq ,” o qeyd edib.

Ağır Cinayətlər Məhkəməsinin son iclasında hakim Azər Tağıyev Xəlilovun ev dustaqlığına keçirilməklə bağlı vəsatəti rədd edərək, onun hələ “islah olunmadığını” deyib. Noyabrın 28-də keçirilən məhkəmə iclasında ev dustaqlığına keçirilmə ilə bağlı vəsatətinin təmin olunmamasından sonra Xəlilov ikinci aclıq aksiyasına başlayıb və bu dəfə quru aclıq edir.

Famil Xəlilov noyabrın 28-də məhkəmədə bildirib ki, COP-29 günlərində onu növbəti məhkəmə prosesində ev dustaqlığına buraxacaqlarına əmin ediblər.

Bundan sonra 88 gün aclıq edən Famil Xəlilov aclığı dayandırıb, səbirsizliklə noyabrın 28-də keçiriləcək məhkəmə iclasını gözləyib. Lakin məhkəmə vəkillərin onun ev dustaqlığına buraxılması barədə vəsatətini təmin etməyib.

Famil Xəlilov əvvəllər həyatı ilə bağlı təhlükə hiss etdiyindən 2015-ci ildə İsveçə mühacirət etməyə məcbur olduğunu bildirib, 8 ilə yaxın həyat yoldaşı və uşaqları ilə orada yaşayıb. 2023-cü ildə Azərbaycana readmissiya olunub.

Bu il mayın 2-də saxlanılan Xəlilova qarşı Cinayət Məcəlləsinin 234.4.3-cü (satış məqsədilə küllü miqdarda narkotik hazırlama, daşıma, saxlama) maddəsi ilə ittiham irəli sürülüb. Fəal barəsində həbs qətimkan tədbiri seçilib. Bu maddədə 5 ildən 12 ilədək həbs cəzası nəzərdə tutulub.

Yaxınları onun təqsirsiz olduğunu, sosial şəbəkələrdəki paylaşımlarına görə cəzalandırıldığını deyirlər.

Fəalın həyat yoldaşı Kiçikxanım Xəlilova bildirib ki, Xəlilov sosial şəbəkələrdə aktiv olduğu, insanların haqqını tələb etdiyi üçün həbs olunub.

Avqustun 29-da Bakı Ağır Cinayətlər Məhkəməsində hakim Azər Tağıyevin sədrliyi ilə Xəlilovun cinayət işi üzrə məhkəmə başlayıb.

Qolları serebral iflic olan Famil Xəlilov məhkəmədə əlləri parça ilə arxadan bağlı şəkildə iştirak edir. Çünki onun qolları o qədər bərk əsir ki, ayaq üstə müvazinətini saxlaya bilmir.

Dövlət rəsmiləri isə bir qayda olaraq insanların qanun qarşısında bərabər olduğunu, iradəsinə görə təqib edilmədiyini bəyan edir.