Fazil Qasımov aclıq etdiyi 60 gündə 22 kq çəki itirib

İstanbul Universitetinin doktorantı, iqtisadçı Fazil Qasımov həbsxanada 60 gündür aclıq edir. Penitensiar Xidmətin Müalicə Müəssisəsində olan Qasımov həbsinə etiraz edir və cinayət təqibinə son qoyulmasını tələb edir.

Bu gün o, qardaşı Nazim Qasımova müraciət edib.

"Fazilin vəziyyəti həddindən artıq ağırdır. O, 22 kq arıqlayıb - 67 kq-dan 45 kq-a düşüb. Səsi zəif gəlirdi. Mədəsində, böyrəklərində, ürəyində güclü ağrılar var. Çətinliklə danışırdı, amma aclığı davam etdirəcəyini dedi", deyə Nazim Qasımov bildirib.

Penitensiar Xidmətdən şərh almaq mümkün olmayıb.

* Fazil Qasımov 7 avqust 2023-cü il tarixində Türkiyədə saxlanılıb və Azərbaycana gətirilib. Ona qarşı CM-in 204.3.1-ci (mütəşəkkil qrup tərəfindən saxta pulların hazırlanması, əldə olunması və ya satışı) maddəsi ilə ittiham irəli sürülüb.

İstintaq sonradan həbs olunan müxalif siyasətçi Qubad İbadoğluna saxta pulu məhz onun verdiyini iddia edir.

Bu yaxınlarda Qasımov baş prokurora, ombudsmaya, yerli və beynəlxalq ictimaiyyətə müraciətində bu ifadələri işgəncə altında verdiyini bildirib. O, bu ifadələrdən imtina edib, İbadoğluna saxta pul vermədiyini, onunla heç vaxt FETÖ (Türkiyədə terrorçu təşkilat kimi tanınan ilahiyyatçı Fətullah Gülənin hərəkatı) mövzusunda müzakirələr aparmadığın bildirib.

İyunun 14-dən etibarən Qasımov əsassız cinayət təqibinə və istintaqın əvvəlində məruz qaldığı işgəncələrə etiraz əlaməti olaraq aclıq edir.