«Formula 1» yarışları günlərində Bakıda rusiyalı erməni həbs olunub

Rusiya vətəndaşı Marat Ueldanov (Qalustyan) bir ay yarımdır ki, Azərbaycan Dövlət Təhlükəsizlik Xidmətinin istintaq təcridxanasında saxlanılır.

Rusiya mətbuatının məlumatına  görə, o, Avstriyanın Do/Co şirkətinin əməkdaşıdır və Bakıda keçirilən “Formula 1” yarışları zamanı qida təşkili məsələləri ilə məşğul olub.

Onun bacısı Marianna Qalustyanın sözlərinə görə, Marat həyat yoldaşının soyadını götürüb və pasportunda bu soyad yazılıb. O,  dəfələrlə Azərbaycanda olub və 2015-ci ildə 1-ci Avropa Oyunlarında da çalışıb.

İyunun 6-da Bakıya gəlib, lakin ondan bir xəbər çıxmayıb. Sonradan məlum olub ki, iyunun 9-da Marat və iş yoldaşı Yelena Makarenko həbs olunub. 15 gündən sonra Yelenanı azad ediblər və o, Moskvaya qayıdıb.

Maratın bacısı bildirib ki, qardaşı Bakı sakini olub, 1982-ci ildə Bakıda anadan olub. Görünür, kimsə onun erməni olması barədə məlumat verib.

Rusiyanın Azərbaycandakı səfirliyi Qalustyanın qohumlarına tövsiyə edib ki, bu ölkənin spesifikasına anlayışla yanaşsınlar. Belə ki, “erməni olması onun müdafiəsini çətinləşdirir”. Bu barədə Rusiyanın Azərbaycandakı səfirliyinin konsulluq şöbəsinin müdirinin həbs olunanın bacısının sorğusuna cavabında deyilir.

Mənbənin məlumatına görə, Ueldanov (Qalustyan) böyük miqdarda qanunsuz narkotik maddənin saxlanmasında və daşınmasında (maddə 234.4.3) ittiham olunur. Lakin onun iş yoldaşı bildirib ki, onu casusluqda şübhəli bilərək həbs ediblər.

Azərbaycan Dövlət Təhlükəsizlik Xidmətindən bununla bağlı şərh almaq mümkün olmayıb.-02D-