Fövqəladə Hallar Nazirliyində seks qalmaqalının “qəhrəmanı” saxlanılıb

Bakı/18.08.22/Turan:  Fövqəladə Hallar Nazirliyinin bir sıra əməkdaşlarının intim xarakterli video və fotolarını yaymaqda şübhəli bilinən şəxs saxlanılıb. Bu barədə avqustun 18-də Baş Prokurorluğun mətbuat xidməti bildirib.

Fövqəladə Hallar Nazirliyinin əməkdaşlarının intim görüntülərinin bəzi media, sosial şəbəkələrdə yayılması ilə bağlı aparılan araşdırmalar zamanı məlum olub ki, Dövlət Yanğından Mühafizə Xidmətinin rəis köməkçisi, polkovnik  Zaur Mirzəyev xidməti kompüterində gizli çəkiliş üçün kamera quraşdırıb.

2013-2019-cu illərdə o, qadın əməkdaşların xidməti və digər asılılığından istifadə edərək onlarla cinsi əlaqəyə girib, bunun video və fotoçəkilişini edib. Bu 2022-ci ilin avqustunda İnternetdə pornomaterialların yayılmasına səbəb olub.

Mirzəyev öz səlahiyyətləri çərçivəsindən kobud şəkilidə kənara çıxaraq ağır nəticələrə səbəb olan cinayət xarakterli əməllər törədib, həmin şəxslərin hüquqi və qanuni maraqlarına, habelə Fövqəladə Hallar Nazirliyinin işgüzar reputasiyasına xələl gətirib.

Faktla bağlı Cinayət Məcəlləsinin 156.2.1-ci (şəxsi həyatın toxunulmazlığının pozulması), 242-ci (pornoqrafik materialların və ya predmetlərin qanunsuz yayılması) və 309.2-ci (vəzifə səlahiyyətlərinin aşılması) maddələrilə cinayət işi başlayıb.

İbtidai istintaqın aparılması Baş Prokurorluğun İstintaq İdarəsinə həvalə edilib. Avqustun 17-də Zaur Mirzəyev şübhəli şəxs qismində saxlanılıb.

Hazırda intensiv istintaq-əməliyyat tədbirləri davam etdirilir. –06B-