Fransa prezidenti Fransua Ollandın Azərbaycana rəsmi səfəri başlayıb

Fransa prezidenti Fransua Ollandın Azərbaycana səfəri Bakıda Fransız litseyinin açılışında iştirakdan başlayıb. Burada 350 şagird təhsil alacaq.

Olland əmin olduğunu bildirib ki, bu təhsil ocağı iki ölkə xalqları arasında əlaqələrin daha da genişlənməsinə öz töhfəsini verəcək. Burada tədris Fransanın təhsil standartlarına uyğun aparılacaq.

“Azərbaycan dünya mədəniyyəti nümunələrinin təmsil olunduğu Luvrda departamentin açılışına yardım göstərib”, -  Olland 2012-ci ildə Luvr muzeyində yeni departamentin açılışına Azərbayanın verdiyi töhfəni məmnunluqla qeyd edib.

Olland həmçinin Fransanın bundan sonra da azərbaycanlı tələbələri bu ölkənin universitetlərinə qəbul etməyə hazır olduğunu bildirib. “Biz Parisdə yeni mərkəz tikirik və Azərbaycandan tələbələri qəbul etməyə hazırıq”, - o bildirib.

Olland Azərbaycanda iqtisadi inkişafın yüksək tempini qeyd edərək Avropa üçün də belə inkişaf arzulayıb.

İkitərəfli iqtisadi əməkdaşlığa toxunan Olland Fransanın təkcə energetika sahəsində deyil, həm də şəhərsalma, nəqliyyat və digər sahələrdə əməkdaşlığın inkişafına tərəfdar olduğunu bildirib.

Öz növbəsində prezident İlham Əliyev Azərbaycanla Fransa arasında siyasi əlaqələrin yüksək səviyyəsini qeyd edib. Bu, digər sahələrə də təsir göstərir.

O ümidvar olduğunu bildirib ki, mayın 12-nə təyin olunmuş biznes-forum ticari əlaqələrin  daha da genişləndirilməsinə xidmət edəcək.

İ.Əliyev litseyin açılışı ilə bağlı əmin olduğunu bildirib ki, bu təhsil müəssisəsi Azərbaycan-Fransa dostluq mərkəzinə çevriləcək. O xatırladıb ki, Parisdə Azərbaycan Mədəniyyət Mərkəzi açılıb. “Bakıdakı litsey Fransanın Azərbaycanda səfirlikdən sonra ikinci guşəsi olacaq”, - o əlavə edib.

İ.Əliyev onu da deyib ki, Bakıda yaradılan “Ağ şəhər”də Paris məhəlləsi inşa ediləcək.—06D--