Fransa və Almaniya səfirləri Azərbaycan və Ermənistan gənclərini iki xalqın barışığına töhfə verməyə çağırıblar

Bakı/03.06.22/Turan:  Azərbaycan gənclərinin on nümayəndəsi iyunun 6-10-da Strasburqda səfərdə olacaq, Fransa, Almaniya və Ermənistandan olan həmyaşıdları ilə görüşəcək.

Görüş OFAJ təşkilatının (Fransız-Alman Gənclərin Ofisi) “Avropa İttifaqının Şərq tərəfdaşlığı çərçivəsində əməkdaşlığın yeni istiqamətləri” proqramı çərçivəsində keçiriləcək.

Fransanın Azərbaycandakı səfiri Zakari Qross bugünkü mərasimdə bildirib ki, OFAJ Fransa, Almaniya və Avropa İttifaqının dəstəklədiyi danışıqlar kontekstində ermənilərlə azərbaycanlılar arasında barış prosesinə yardım göstərməyə çalışır.

“Bu təşəbbüs ötən ilin sonunda Brüsseldə liderlərin görüşündə müzakirə edilib və razılaşdırılıb. Almaniya və Fransanın birgə təşəbbüsü “Şərq tərəfdaşlığı” çərçivəsində həyata keçirilir”, - Qross deyib.

Diplomat qeyd edib ki, İkinci Dünya Müharibəsindən sonra Almaniya və Fransa arasında əldə olunmuş barış Azərbaycanla Ermənistan arasında da mümkündür və o, buna inanır.

“Belə görüş ilk dəfə Strasburqda keçiriləcək. Biz çox şadıq ki, gənc nəsil regionda sülhə dəstəyini ifadə edir. Sülh quruculuğunun vaxtı çatıb. Bilirəm ki, bu, asan deyil, lakin çox vacibdir”, - səfir sözünə davam edib.

Zəngilan, Ağdam və işğaldan azad edilmiş digər ərazilərdə infrastrukturun qurulduğuna, yenidənqurma işlərinin davam etdiyinə diqqət çəkən Qross qeyd edib ki, “heç kim istəmir ki, gələcəkdə bu ərazilər yenidən hücuma məruz qalsın, yenidən münaqişə yaransın”.

“Bundan ötrü sülh vacibdir. Avropa İttifaqı bu regionda sülhü və sabitliyi dəstəkləyir və bu prosesə töhfə verməyə hazırdır”, - Qross deyib.

Öz növbəsində Almaniya səfiri Volfqanq Maniq Fransa və Almaniya Xarici İşlər nazirliklərinin bu prosesə dəstəyini qeyd edib. “Almaniya və Fransa arasında münaqişələr yüz illərdir davam edib, lakin onlar öz bölgələrində sülhə nail olublar. Yerevandakı həmkarlarımız sizin ünsiyyətdə olacağınız erməni gənclərilə görüş keçirirlər”, - səfir proqram iştirakçılarına müraciət edib.

O qeyd edib ki, iki ölkənin gəncləri ümumi gələcəyi müzakirə edəcəklər. “Bizim region gənclər üçün ilham mənbəyi olacaq. Çətindir, amma biz prosesə başlamışıq. Əminəm ki, siz də Fransa və Almaniya xalqlarının təcrübəsindən istifadə edəcəksiniz. Ölkələrimizin nailiyyətlər göstərir ki, barış və sülh mümkündür. Ümid edirəm ki, belə gələcək bu regionda da mümkündür”, - Almaniya səfiri vurğulayıb.—06B-