G7 liderləri Rusiyaya qarşı mübarizədə Ukraynanı dəstəklədiklərini təsdiq edirlər

Vaşinqton/13.12.22/Turan: G7 ölkələri bazar ertəsi Ukrayna prezidenti Vladimir Zelenski ilə danışıblar və Rusiya təcavüzünə qarşı mübarizədə kömək edəcəklərini təsdiq ediblər, bu barədə Turan-ın Vaşinqtondakı müxbiri bildirib.

Ağ Evdə görüşdən sonra dərc edilmiş bəyanatda G7 liderləri Ukraynaya "nə qədər lazımdırsa, o qədər" dəstək verəcəklərini vəd ediblər, Kremlin hərəkətlərini "qanunsuz, əsassız və səbəbsiz təcavüzkar müharibə" adlandırıblar.

"Hərbi cinayətlər cəzasız qala bilməz... Biz prezident Putini və təqsirkarları beynəlxalq hüquqa uyğun olaraq məsuliyyətə cəlb edəcəyik. Təkrar edirik ki, Rusiyanın məsuliyyətsiz nüvə ritorikası qəbuledilməzdir və kimyəvi, bioloji və ya nüvə silahından istənilən istifadənin ciddi nəticələri olacaq", deyə bəyanatda bildirilir.

Liderlər 2023-cü ildə Beynəlxalq Valyuta Fondu vasitəsilə Ukraynaya necə maliyyə dəstəyi göstəriləcəyini həll etmək üçün "yaxın gələcəkdə" maliyyə nazirlərinin görüşünü keçirməyi vəd ediblər.

Onlar həmçinin Rusiya neftindən imtina etməyə davam etmək və fevralın əvvəllərində onun qiymətinin maksimum həddini müəyyən etmək qərarlarını təsdiq ediblər. 0